«له ایران سره هوکړه کې بېړه مه کوئ»؛ ټرمپ د سمندري کلابندۍ د دوام خبره وکړه

«له ایران سره هوکړه کې بېړه مه کوئ»؛ ټرمپ د سمندري کلابندۍ د دوام خبره وکړه

بریا نیوز (دوشنبه ،۴جوزا، ۱۴۰۵)

د امریکا ولسمشر ډونالډ ټرمپ ویلي، خپلو استازو ته یې سپارښتنه کړې چې له ایران سره د هر ډول هوکړې په برخه کې دې بېړه نه کوي او خبرې دې په پوره ځیرتیا او سخت دریځ سره پر مخ یوسي

ټرمپ ویلي، واشنګټن غواړي داسې هوکړه رامنځته شي چې د امریکا ګټې خوندي کړي او د ایران له لوري د هر ډول ګواښ مخه ونیول شي. د نوموړي په وینا، تر هغو چې وروستۍ هوکړه بشپړه شوې نه وي، پر ایران لګېدلې سمندري کلابندي به روانه وي

هغه ټینګار کړی، امریکا نه غواړي داسې تړون لاسلیک کړي چې وروسته د ستونزو او شخړو لامل شي. د ده په خبره، د ایران په اړه پرېکړې به په احتیاط او پوره ارزونه ترسره کېږي

ټرمپ دا څرګندونې داسې مهال کړې چې په وروستیو ورځو کې د واشنګټن او تهران ترمنځ د احتمالي هوکړې په اړه بېلابېلې اوازې او راپورونه خپاره شوي دي

سیاسي شنونکي وایي، د امریکا له لوري د سمندري کلابندۍ دوام ښيي چې د دواړو خواوو ترمنځ لا هم بې‌ باوري او کړکېچ پر خپل ځای پاتې دی

د نوموړي د خبرو له مخې، امریکا هڅه کوي پر ایران فشار وساتي څو تهران د واشنګټن غوښتنو ته غاړه کېږدي. بلخوا ایراني چارواکو تر دې وړاندې ویلي وو چې فشارونه او بندیزونه به د دوی دریځ بدل نه کړي

شنونکي باور لري، که د دواړو هېوادونو ترمنځ خبرې اوږدې شي او کړکېچ کم نه شي، نو دا وضعیت به د سیمې پر سوداګرۍ، سمندري لارو او امنیت هم اغېز وکړي