د اسراییلو پرله‌ پسې هوايي بریدونو د لبنان په جنوب کې مرګ‌ژوبله زیاته کړې

د اسراییلو پرله‌ پسې هوايي بریدونو د لبنان په جنوب کې مرګ‌ژوبله زیاته کړې

بریانیوز( دوشنبه، ۱۱ جوزا ١٤٠٥)

د لبنان په جنوب کې د اسراییلو د پراخو هوايي بریدونو له امله لږ تر لږه ۱۲ کسان وژل شوي او لسګونه نور ټپیان شوي دي. سیمه‌ییزو سرچینو او روغتیايي چارواکو ویلي چې دغه بریدونه د یکشنبې په ورځ د جنوب پر بېلابېلو سیمو ترسره شوي او د استوګنې کورونو، عامه تاسیساتو او روغتیايي مرکزونو ته یې هم زیان رسولی دی

د راپورونو له مخې، د صور ولسوالۍ اړوند په «العباسیه» ښارګوټي کې د اسراییلو په یوه برید کې څلور کسان وژل شوي دي. همدارنګه د «دیرالزهراني» سیمې په «حی العرب» کې د څو پرله‌پسې بریدونو له امله اته کسان وژل شوي او ۱۹ نور ټپیان شوي دي. سرچینې وایي چې په دغو بریدونو کې ګڼ استوګنیز کورونه هم ویجاړ شوي او د ژغورنې ډلې لا هم د زیانمنو شویو سیمو د پلټنې چارې پر مخ وړي

په «جدیده انصار» سیمه کې د یوه بل برید له امله درې کسان، چې دوه ماشومان هم پکې شامل دي، ټپیان شوي دي. همدارنګه د «عدیسه» په سیمه کې پر یوه موټرسایکل د برید له امله درې نور کسان ژوبل شوي دي

راپورونه دا هم څرګندوي چې د صور ښار د «حیرام» روغتون ته نږدې په یوه برید کې ۱۳ روغتیايي کارکوونکي او نرسان ټپیان شوي دي. روغتیايي سرچینو ویلي، د روغتون شاوخوا سیمو کې د چاودنو له امله د بیړنیو مرستو چارې له ستونزو سره مخ شوې او د ټپیانو د لېږد بهیر یې اغېزمن کړی دی

دغه بریدونه داسې مهال ترسره کېږي چې د اسراییلو او لبنان ترمنځ کړکېچ په بې‌ساري ډول پراخ شوی دی

د وروستیو میاشتو راهیسې د اسراییلو او حزب‌الله ترمنځ نښتې زیاتې شوې او دواړو لورو یو بل د اوربند له سرغړونو تورن کړي دي. اسراییلي ځواکونو په جنوبي لبنان کې خپلې پوځي کړنې پراخې کړې او ځینې ستراتیژیکې سیمې یې هم تر خپل کنټرول لاندې راوستې دي

د لبنان چارواکي وایي چې روان بریدونه د ملکي وګړو ژوند له جدي ګواښ سره مخ کوي او زرګونه کورنۍ یې د خپلو مېنو پرېښودو ته اړ کړې دي. د نړیوالو بنسټونو په وینا، د جګړې له پراخېدو سره د بې‌ځایه شویو کسانو شمېر هم په چټکۍ لوړېږي او بشري وضعیت ورځ تر بلې خرابېږي

سیاسي شنونکي باور لري چې که د تاوتریخوالي د کمولو لپاره ژر اغېزمن ګامونه پورته نه شي، نو د لبنان او اسراییلو ترمنځ روانه جګړه کولای شي د سیمې د لا پراخې بې‌ثباتۍ لامل شي او د منځني ختیځ امنیتي وضعیت نور هم پیچلی کړي