مقاله

کابل د افغانستان په تړاو د ملګرو ملتونو په امنیت شورا کې د چین نوې ونډه وستایله

اشتراک گذاری:

بریانیوز( دوشنبه، ۱۱ جوزا ١٤٠٥)

کابل د افغانستان په اړه د ملګرو ملتونو د امنیت شورا د سلا مشورو او پرېکړه لیکونو د چمتو کولو د مسئولیت د چین له لوري پر غاړه اخیستل یو مهم او هیله بښونکی ګام بللی دی

د افغانستان د چارو څارونکي وایي، چین په داسې مهال د امنیت شورا د «قلم لرونکي هېواد» مسئولیت پر غاړه اخلي چې د افغانستان د سیاسي، اقتصادي او سیمه ییزو اړیکو په برخه کې د نوې همغږۍ اړتیا تر بل هر وخت زیاته احساسېږي

د چین له دې نوې ونډې سره تمه کېږي چې د افغانستان اړوند موضوعات به د ملګرو ملتونو په چوکاټ کې په لا پراخ لید، متوازن دریځ او رغنده تګلارې وڅېړل شي

شنونکي باور لري چې بیجینګ کولای شي د سیمې د هېوادونو ترمنځ د همغږۍ د پیاوړتیا او د افغانستان د ثبات، پرمختګ او نړیوال تعامل لپاره اغېزمن رول ولوبوي

کابل د چین له دې ګام هرکلی کړی او هیله یې څرګنده کړې چې د افغانستان په اړه راتلونکې پرېکړې به د هېواد د ملي ګټو، اقتصادي ودې، سیمه ییز اتصال او د خلکو د هوساینې پر بنسټ ولاړې وي

کارپوهان وایي، د امنیت شورا په کچه د چین مخکښ رول ښایي د افغانستان د موضوع په اړه د نړیوالو بحثونو نوی پړاو پرانیزي او د رغنده خبرو اترو لپاره لا ډېر فرصتونه رامنځته کړي