اوچا: د افغانستان نږدې ۲۲ میلیونه وګړي بشري مرستو ته اړتیا لري

اشتراک گذاری:

بریانیوز - چهارشنبه، ١٣ جوزا ١٤٠٥

د ملګرو ملتونو د بشري مرستو د همغږۍ دفتر (اوچا) په خپل تازه راپور کې ویلي چې د روان زېږدیز کال په لومړیو درېیو میاشتو کې شاوخوا ۲۱.۹ میلیونه افغانان د ژوند په بېلابېلو برخو کې بشري مرستو ته اړ شوي دي

د راپور له مخې، اوچا پلان درلود چې د هېواد ۱۷.۵ میلیونه اړمنو وګړو ته مرستې ورسوي، خو د بودجې د سخت کمښت له امله یې یوازې ۴.۷ میلیونه کسانو ته د مرستو رسولو توان موندلی، چې د ټاکل شوي هدف نږدې اووه ویشت سلنه جوړوي

اوچا زیاته کړې چې د اړمنو کورنیو د اړتیاوو د پوره کولو لپاره ۱.۷ میلیارده ډالرو بودجې ته اړتیا وه، خو تر اوسه یوازې ۱۹۵ میلیونه ډالر برابر شوي، چې د ټولې غوښتل شوې بودجې یوازې یوولس سلنه ده

راپور ښيي چې د مرستو تر لاسه کوونکو له ډلې نهه څلوېښت سلنه ماشومان، دېرش سلنه ښځې او یوویشت سلنه نارینه دي، چې دا د هېواد د بشري ناورین پراخوالی او د زیانمنو قشرونو لوړه اړتیا په ډاګه کوي

د بشري چارو شنونکي وایي، که د مرستندویه بنسټونو د بودجې تشه ژر ډکه نه شي، نو میلیونونه افغانان به د خوړو، روغتیايي خدمتونو، پاکو اوبو او نورو بنسټیزو اړتیاوو له لا سخت کمښت سره مخ شي

افغانستان لا هم د نړۍ له هغو هېوادونو څخه ګڼل کېږي چې د اوږدمهالو اقتصادي ستونزو، وچکالۍ، بېوزلۍ او بې‌کارۍ له امله د بشري مرستو پراخې اړتیاوې لري