مقاله

چین د افغانستان او پاکستان ترمنځ د اورمچي خبرو د پرمختګ لپاره هڅې ګړندۍ کړې

اشتراک گذاری:

بریانیوز - چهارشنبه، ١٣ جوزا ١٤٠٥

د افغانستان لپاره د چین ځانګړي استازي یو شیاویونګ ویلي چې د پاکستان په پلازمېنه اسلام‌اباد کې یې د افغانستان لپاره د پاکستان له ځانګړي استازي محمد صادق سره لیدنه کړې او د دواړو هېوادونو ترمنځ د اړیکو د پیاوړتیا په موخه یې پر مهمو موضوعاتو خبرې اترې کړې دي

د نوموړي په وینا، په دې لیدنه کې د چین په کوربتوب د افغانستان او پاکستان ترمنځ د اورمچي د خبرو اترو پر بهیر رغنده او هر اړخیز بحث شوی دی. هغه زیاته کړې چې بېجینګ د سیمې د ثبات، اقتصادي همکارۍ او متقابل باور د پیاوړتیا لپاره د دواړو ګاونډیو هېوادونو ترمنځ د خبرو دوام مهم ګڼي

شنونکي باور لري چې د اورمچي خبرې اترې کولی شي د کابل او اسلام‌اباد ترمنځ د شته اندېښنو د کمېدو، د سیاسي اړیکو د ښه کېدو او د ګډو اقتصادي فرصتونو د پراختیا لپاره مناسب چاپېریال رامنځته کړي

چین په وروستیو کلونو کې هڅه کړې چې د افغانستان او پاکستان ترمنځ د اړیکو په نږدې کولو کې رغنده رول ولوبوي او د سیمه‌ییزو همکاریو لپاره د باور جوړونې نوې لارې پرانیزي

د دواړو استازو دا لیدنه په داسې مهال ترسره کېږي چې سیمه د امنیتي، اقتصادي او سیاسي بدلونونو له حساسو پړاوونو تېرېږي او د ګډو ننګونو د حل لپاره د سیمه‌ییزې همغږۍ اړتیا تر بل هر وخت زیاته احساسېږي