د ماشومانو د ودونو د زیاتوالي په اړه د ملګرو ملتونو راپور رد شو

اشتراک گذاری:

بریانیوز - چهارشنبه، ١٣ جوزا ١٤٠٥

د اسلامي امارت د امر بالمعروف، نهی عن المنکر او شکایتونو اورېدلو وزارت د ملګرو ملتونو هغه وروستي راپورونه رد کړي چې ګواکې په افغانستان کې د ماشومانو ودونه زیات شوي دي

دغه وزارت ویلي، د ملګرو ملتونو څرګندونې او ادعاوې له واقعي وضعیت سره سمون نه لري او په هېواد کې د ماشومانو د ودونو د زیاتوالي په اړه خپاره شوي راپورونه د کره شواهدو پر بنسټ نه دي ولاړ

د وزارت مسئولینو ټینګار کړی چې اسلامي امارت د اسلامي ارزښتونو او نافذو اصولو له مخې د کورنۍ او ټولنې د چارو تنظیم ته ژمن دی او د نکاح او واده اړوند چارې د ټاکل شویو چوکاټونو له مخې ترسره کېږي

دا غبرګون وروسته له هغه څرګند شو چې د ملګرو ملتونو ځینو ادارو په خپلو ارزونو کې ویلي وو، اقتصادي ستونزې او د ژوند سخت شرایط ښایي په افغانستان کې د کم عمره نجونو د ودونو د زیاتېدو لامل شوي وي

خو د اسلامي امارت د امر بالمعروف او نهی عن المنکر وزارت دغه ارزونې ناسمې بللې او ویلي یې دي چې نړیوال بنسټونه باید د افغانستان د ټولنیزو واقعیتونو په اړه خپل راپورونه د دقیقو او باوري معلوماتو پر بنسټ چمتو کړي

د ماشومانو د ودونو موضوع په وروستیو کلونو کې د نړیوالو بنسټونو او افغان چارواکو ترمنځ له هغو مسایلو څخه ده چې په اړه یې بېلابېل لیدلوري وړاندې شوي او هر لوری د خپلو معلوماتو او ارزونو پر بنسټ دریځ څرګندوي