د جنوبي ترکستان تر شعارونو د دوستم چوپتیا؛ پټ ملاتړ که له مسؤلیت څخه تېښته؟

د ملي جنبش ګوند د ځینو مخکښو غړو له خوا د «جنوبي ترکستان» د طرحې له مطرح کېدو وروسته، د ګوند د مشر جنرال عبدالرشید دوستم چوپتیا ګڼې پوښتنې راولاړې کړې دي.

بریانیوز - چهارشنبه، ١٣ جوزا ١٤٠٥

په وروستیو میاشتو کې د افغانستان د شمال او د «جنوبي ترکستان» د طرحې په اړه د ملي جنبش ګوند د ځینو مخکښو غړو څرګندونو پراخ بحثونه راپارولي دي. نقیب الله فایق، عنایت الله بابر فرهمند او بشیر احمد تینج په بېلابېلو مناسبتونو کې داسې دریځونه وړاندې کړي چې د هېواد د سیاسي راتلونکي، ملي یووالي او جغرافیایي بشپړتیا له موضوعاتو سره مستقیم تړاو لري. خو د دې ټولو څرګندونو په مقابل کې د ملي جنبش د مشر جنرال عبدالرشید دوستم چوپتیا د پام وړ ده.

په سیاسي ډګر کې چوپتیا تل بې‌معنا نه وي. په ځانګړي ډول کله چې د یوه ګوند لوړپوړي غړي د داسې حساسو موضوعاتو په اړه څرګندونې کوي چې د هېواد د سیاسي جوړښت د بدلون تصور ورسره تړل کېږي، د ګوند د مشر چوپ پاتې کېدل خپله یو سیاسي پیغام ګڼل کېدای شي. که د دغو څرګندونو سره مخالفت موجود وي، طبیعي خبره دا ده چې د ګوند مشرتابه باید خپل دریځ روښانه کړي. او که موافق وي، نو هم باید په څرګند ډول یې مسؤلیت ومني.

د جنرال دوستم سیاسي سابقه ښيي چې هغه د خپلو نږدې همکارانو او د ګوند د مهمو شخصیتونو پر فعالیتونو بشپړ نظر لري. له همدې امله دا تصور ستونزمن دی چې د ګوند د څو مخکښو غړو له خوا د «جنوبي ترکستان» په څېر یوه لویه او جنجالي موضوع مطرح شي او مشرتابه ترې ناخبره پاتې شي.

له دې وړاندې، کله چې د بګرام هوايي اډې او د امریکا د احتمالي رول په اړه د بشیر احمد تینج څرګندونې خپرې شوې، د ګوند له لوري چټک غبرګون ولیدل شو او حتی د هغه پر سیاسي موقف اغېز هم واچاوه. خو اوس چې د هېواد د جغرافیایي او سیاسي راتلونکي په اړه تر دې هم لوی بحث راپورته شوی، د ګوند مشرتابه چوپ پاتې دی. دا توپیر پوښتنې راولاړوي او د خلکو شکونه زیاتوي.

د دوستم چوپتیا ښايي د یوې محاسبې شوې سیاسي تګلارې برخه وي. یعنې لومړی د ټولنې غبرګون ارزول کېږي او وروسته د پایلو له مخې رسمي دریځ ټاکل کېږي. که دا تحلیل سم وي، نو د ګوند چوپتیا د بې‌پروايۍ نښه نه، بلکې د یو غیرمستقیم سیاسي ازموینې وسیله ده.