د اتو اسلامي هېوادونو د بهرنیو چارو وزیرانو په مسجدالاقصی کې وروستي اقدامات په کلکو ټکو وغندل

د اتو اسلامي هېوادونو د بهرنیو چارو وزیرانو په مسجدالاقصی کې وروستي اقدامات په کلکو ټکو وغندل

بریانیوز( چهارشنبه، ۱۲ جوزا ١٤٠٥)

د قطر، متحده عربي اماراتو، اردن، ترکیې، مصر، اندونیزیا، پاکستان او سعودي عربستان د بهرنیو چارو وزیرانو په یوې ګډې اعلامیې کې په مسجدالاقصی کې وروستي اقدامات په سختو ټکو غندلي او د دغه سپېڅلي ځای د تاریخي او حقوقي حیثیت د ساتنې غوښتنه یې کړې ده

په ګډه اعلامیه کې راغلي چې یادو هېوادونو د مسجدالاقصی پر وړاندې ترسره شوي وروستي ګامونه د اندېښنې وړ بللي او ټینګار یې کړی چې دا ډول کړنې د سیمې د وضعیت د لا ترینګلتیا لامل کېدای شي

د دغو هېوادونو د بهرنیو چارو وزیرانو ویلي چې د سپېڅلو ځایونو درناوی او د هغوی د تاریخي او قانوني حالت ساتل باید د ټولو لورو له خوا په پام کې ونیول شي. هغوی همدارنګه د هغو اقداماتو د مخنیوي غوښتنه کړې چې د تاوتریخوالي د زیاتېدو او د وضعیت د خرابېدو سبب ګرځي

اعلامیه زیاتوي چې د منځني ختیځ د سولې، ثبات او امنیت لپاره اړینه ده چې د نړیوالو پرېکړو او منل شویو اصولو درناوی وشي او له هر ډول پاروونکو کړنو ډډه وشي

د مسجدالاقصی موضوع له اوږدې مودې راهیسې د اسلامي نړۍ له مهمو اندېښنو څخه ګڼل کېږي او هر ځل چې په دغه سپېڅلي ځای کې وضعیت ترینګلی شي، د سیمې او نړۍ د ګڼو هېوادونو غبرګونونه راپاروي

د اتو اسلامي هېوادونو دغه ګډ دریځ په داسې مهال څرګندېږي چې د مسجدالاقصی اړوند وروستیو پېښو په نړیواله کچه پراخ غبرګونونه راپارولي او د وضعیت د ارامولو غوښتنې زیاتې شوې دي