د ملګرو ملتونو د امنیت شورا غړي د اسلامي امارت د نومولو پر څرنګوالي لا هم یوه خوله نه دي

د ملګرو ملتونو د امنیت شورا غړي د اسلامي امارت د نومولو پر څرنګوالي لا هم یوه خوله نه دي

بریانیوز( چهارشنبه، ۱۲ جوزا ١٤٠٥)

د امنیت شورا د چارو د څار بنسټ په خپل تازه راپور کې ویلي چې د ملګرو ملتونو د امنیت شورا غړي لا هم په دې اړه بېلابېل دریځونه لري چې اسلامي امارت باید د ملګرو ملتونو په رسمي سندونو کې په کوم نوم یاد شي

د راپور له مخې، دغه اختلاف یوازې د نوم کارونې تر کچې محدود نه دی، بلکې له افغانستان سره د نړیوال تعامل، سیاسي اړیکو او د اوسني وضعیت په اړه د غړو هېوادونو د لیدلورو ژور توپیرونه هم په ډاګه کوي

راپور څرګندوي چې دا بحثونه په داسې وخت کې روان دي چې د امنیت شورا د افغانستان لپاره د ملګرو ملتونو د مرستندویه پلاوي د ماموریت د مودې د غځولو پر موضوع غور کوي او د راتلونکو پرېکړو لپاره چمتووالی نیسي

د سرچینې په وینا، د شورا ځینې غړي د افغانستان د اوسني واکمن نظام لپاره د ځانګړو نومونو کارولو ملاتړ کوي، خو ځینې نور هېوادونه د دې موضوع په اړه بېل دریځ لري

همدې اختلاف د افغانستان اړوند د ځینو رسمي سندونو د متنونو پر جوړولو او تصویب هم اغېز کړی دی

شنونکي باور لري چې د امنیت شورا د غړو ترمنځ د نظر اختلاف د افغانستان په اړه د نړیوالې تګلارې د نه همغږۍ څرګندونه کوي. د دوی په اند، تر هغه چې د شورا غړي د افغانستان د سیاسي وضعیت او د تعامل د څرنګوالي په اړه ګډ تفاهم ته ونه رسېږي، د نړیوالو دریځونو یووالي به له ستونزو سره مخ وي

دا راپور په داسې مهال خپرېږي چې د افغانستان په اړه د نړیوالې ټولنې بحثونه دوام لري او د ملګرو ملتونو راتلونکې پرېکړې د هېواد پر سیاسي او ډیپلوماټیک وضعیت مهم اغېز لرلی شي