اوچا: ایسلنډ د افغانستان بشري صندوق ته څه باندې ۴۰۰ زره ډالر مرسته ورکړه

اشتراک گذاری:

بریانیوز(پنجشنبه، ۱۲ جوزا ١٤٠٥)

د ملګرو ملتونو د بشري چارو د همغږۍ دفتر (اوچا) ویلي چې ایسلنډ د افغانستان د بشري مرستو صندوق ته ۵۰ میلیونه ایسلنډي کرونې، چې شاوخوا ۴۰۲زره امریکایي ډالر کېږي، مرسته کړې ده

اوچا په خپره کړې خبرپاڼه کې ویلي چې دغه مالي مرسته به د افغانستان د بشري اړتیاوو د پوره کولو او له زیانمنو کورنیو سره د مرستو د بهیر د پیاوړتیا لپاره وکارول شي

د دې ادارې په وینا، افغانستان لا هم له پراخو بشري ننګونو سره مخ دی او میلیونونه وګړي د خوراکي توکو، روغتیايي خدمتونو، پاکو اوبو او نورو بنسټیزو اړتیاوو د ترلاسه کولو لپاره مرستو ته اړتیا لري

اوچا د ایسلنډ د مرستې هرکلی کړی او ویلي یې دي چې د نړیوالو مرستندویانو دوامداره ملاتړ د بشري مرستو د پروګرامونو د دوام لپاره حیاتي ارزښت لري

شنونکي باور لري چې که څه هم دا مرسته د افغانستان د ټولو بشري اړتیاوو د پوره کولو لپاره کافي نه ده، خو کولای شي د زرګونو اړمنو کورنیو د لومړنیو اړتیاوو په برابرولو کې مهمه ونډه ولري

دا مرسته په داسې مهال اعلانېږي چې نړیوالو مرستندویه بنسټونو په وار وار خبرداری ورکړی چې افغانستان لا هم د نړۍ له سترو بشري بحرانونو څخه له یوه سره مخ دی او د مرستو د کموالي له امله د میلیونونو کسانو ژوند له خطر سره مخ کېدای شي