د پېښور سترې محکمې یوه افغان ته د پاکستاني تابعیت د ورکولو امر کړی

د پېښور سترې محکمې یوه افغان ته د پاکستاني تابعیت د ورکولو امر کړی

بریانیوز- شنبه ، ۲۳ جوزا١٤٠۵

د پېښور سترې محکمې د یوه افغان وګړي د زېږون اسنادو او نورو پاکستاني رسمي مدارکو ته په کتو اړوندو ادارو ته امر کړی چې نوموړي ته د پاکستان تابعیت ورکړي

دغه پرېکړه د محکمې د دوه کسیزې جرګې له لوري شوې چې قاضي وقار احمد او قاضي کامران حیات میانخېل پکې شامل وو. محکمې د عریضه کوونکي د وکیل ثناء ګلزار استدلالونه تر اورېدو وروسته دا حکم صادر کړی دی

د محکمې د پرېکړې له مخې، د پاکستان د احوال نفوسو او ثبت ادارې (نادرا) ته لارښوونه شوې چې د نوموړي د کډوالۍ اړوند ثبت شوي اسناد لغوه کړي او د پاکستاني تابعیت د ترلاسه کولو قانوني بهیر بشپړ کړي

خو بل لور ته، د پېښور سترې محکمې د افغان کډوالو له خوا د پاکستاني تابعیت د ترلاسه کولو لسګونه نورې غوښتنې هم ارزولي چې له ډلې یې شاوخوا ۱۰۰ غوښتنلیکونه رد شوي دي

محکمې اړوندو ادارو ته سپارښتنه کړې چې په دغو قضیو کې د پاکستان د نافذه قوانینو، اساسي اصولو او پخوانیو قضايي پرېکړو له مخې عمل وکړي

دغه عریضې د هغو افغان وګړو له لوري وړاندې شوې وې چې د «پي او آر» او «اې سي سي» کارتونه لري او د پاکستان د تابعیت غوښتونکي وو

د حقوقي چارو شنونکي وایي، دا پرېکړه ښيي چې د تابعیت هره قضیه به د وړاندې شویو اسنادو، د زېږون د ثبت، د استوګنې مودې او قانوني شرایطو پر بنسټ په جلا توګه ارزول کېږي، نه دا چې د ټولو غوښتونکو لپاره یو ډول پرېکړه وشي

تمه ده چې د محکمې بشپړ او تفصیلي حکم به په راتلونکو ورځو کې خپور شي