واشنګټن :د امریکا په منځګړیتوب د لبنان او اسرائیل ترمنځ د نویو خبرو اترو پيل؛ د سولې او بې‌وسلې کولو پر سر ژور اختلافات

واشنګټن :د امریکا په منځګړیتوب د لبنان او اسرائیل ترمنځ د نویو خبرو اترو پيل؛ د سولې او بې‌وسلې کولو پر سر ژور اختلافات

بریانیوز- چهار شنبه ۳ سرطان ١٤٠٥

واشنګټن – په داسې حال کې چې د لبنان په جنوب کې تاوتریخوالی او پراګنده نښتې لا هم دوام لري، د امریکا په منځګړیتوب د لبنان او اسرائیل ترمنځ د کړکېچ د مهارولو لپاره د ډیپلوماټیکو هڅو نوی پړاو پیل شوی دی

د راپورونو له مخې، د سه‌شنبې له ورځې راهیسې په واشنګټن کې د دواړو لورو ترمنځ مستقیمې خبرې اترې پیل شوې دي. دغه مذاکرات د امریکا په منځګړیتوب ترسره کېږي او موخه یې د سرحدي کړکېچونو کمول، د امنیتي اندېښنو حل او د اوږدمهاله ثبات لپاره د یوې سیاسي لارې موندل بلل کېږي

د اسرائیل د لومړي وزیر د دفتر ویاند، ډیویډ منسر، ویلي چې هېواد یې له لبنان سره د امریکا په منځګړیتوب مستقیمې خبرې کوي. د هغه په وینا، د دغو مذاکراتو اساسي هدف د حزب‌الله بې‌وسلې کول او د دواړو لورو ترمنځ یوې "حقیقي سولې" ته رسېدل دي

خو په مقابل کې، د لبنان دننه سیاسي او امنیتي دریځونه له اسرائیلي غوښتنو سره ژور اختلاف لري. حزب‌الله او د لبنان ګڼ سیاسي جریانونه ټینګار کوي چې د لبنان په خاوره کې د اسرائیلي ځواکونو هر ډول پوځي حضور د منلو وړ نه دی او باید ټول بهرني ځواکونه له جنوبي سیمو ووځي

د لبنان د پارلمان غړي ایوب حمید خبرداری ورکړی چې د اسرائیل سیمه‌ییز سیاستونه لا هم د پراخېدو پر لور روان دي. نوموړي ویلي: "هغوی د داسې یوې نقشې په اړه خبرې کوي چې د مصر، اردن، عراق، لبنان، سوریې او آن د عربي ټاپووزمې ځینې برخې پکې شاملې دي. که څه هم ځینې وخت بریدونه کمېږي، خو د بیا پراخېدو احتمال یې تل موجود وي

په همدې حال کې د جګړې بشري زیانونه هم د اندېښنې وړ بلل کېږي. د راپورونو له مخې، د مارچ میاشتې له دویمې نېټې راهیسې، چې د اوربند اعلان شوی و، د اسرائیلي بریدونو او امنیتي پېښو په پایله کې په لبنان کې د وژل شویو کسانو شمېر له څلور زرو او سلو تنو اوښتی دی

سیاسي شنونکي باور لري چې د واشنګټن دا مذاکرات به د منځني ختیځ د امنیتي وضعیت لپاره مهم ازمېښت وي، ځکه د سولې د خبرو بریالیتوب یا ناکامي کولای شي د سیمې پر راتلونکو سیاسي او پوځي تحولاتو ژور اغېز ولري