اقتصاد

نړیوال بانک: د خوړو او کرنې پیاوړتیا افغانستان کې د کارموندنې او اقتصادي ودې لامل کېدای شي

اشتراک گذاری:

بریانیوز - دوشنبه، ١۵ سرطان ١٤٠٥

نړیوال بانک په خپل تازه راپور کې ویلي، د خوړو او کرنې د نظامونو پیاوړتیا کولای شي په افغانستان او سیمه کې د خوړو خوندیتوب پیاوړی کړي، د کار نوې زمینې برابرې کړي او د اقتصادي ستونزو پر وړاندې د خلکو د درېدو وړتیا لوړه کړي

د راپور له مخې، افغانستان د سیمې له هغو هېوادونو څخه دی چې د اقلیمي بدلونونو، د اوبو له کمښت، وچکالۍ، شخړو او د خوړو د ناامنۍ له زیاتېدونکو ګواښونو سره مخ دی. نړیوال بانک وایي، دغو ستونزو د کرنې تولید، د خلکو ژوند او اقتصادي ودې ته زیان رسولی دی

نړیوال بانک ټینګار کوي، که د کرنې، اوبو لګولو، خوړو د پروسس، زېرمه کولو او بازار موندنې په برخو کې پراخه پانګونه وشي او د سوداګرۍ چاپېریال ښه شي، نو د خوړو د تولید او وېش ټوله کړۍ به پیاوړې شي او د سیمې اقتصاد به هم وده وکړي

د راپور پر بنسټ، تر ۲۰۵۰ کال پورې د افغانستان په ګډون د سیمې د خوړو او کرنې په سکټور کې د نږدې پنځه میلیونه نویو کاري فرصتونو د رامنځته کېدو امکان شته، چې دا به د بېکارۍ په کمېدو، د خلکو د عایداتو په زیاتېدو او د خوړو د خوندیتوب په پیاوړتیا کې مهم رول ولوبوي