اخبار جهان

د ملګرو ملتونو خبرداری: افغانستان د بې‌ځایه کېدو له ستر بشري ناورین سره مخ دی

اشتراک گذاری:

بریانیوز - سه شنبه، ١۶ سرطان ١٤٠٥

د ملګرو ملتونو اړوندو ادارو خبرداری ورکړی چې افغانستان دا مهال د نړۍ له تر ټولو لویو بې‌ځایه کېدو له ناورینونو څخه له یوه سره مخ دی، او د هېواد بشري او اقتصادي وضعیت ورځ تر بلې له لا ډېرو فشارونو سره مخ کېږي

د ملګرو ملتونو د پرمختیايي ادارې د څرګندونو له مخې، بې‌وزلي، پرله‌پسې وچکالي، زلزلې، د شاوخوا ۲.۷ میلیونه افغان کډوالو بېرته راستنېدل او اقتصادي ستونزې د میلیونونو خلکو پر ژوند او د عامه خدمتونو پر وړاندې دروند فشار اچولی دی

یادې ادارې ویلي، د کډوالو د پراخې راستنېدنې له امله د سرپناه، روغتیا، ښوونې، پاکو اوبو او د کارموندنې اړتیاوې زیاتې شوې دي، په داسې حال کې چې ډېری سیمې د دغو اړتیاوو د پوره کولو لپاره کافي امکانات نه لري

ملګرو ملتونو ټینګار کړی چې د افغانستان د بشري وضعیت د لا خرابېدو د مخنیوي لپاره د نړیوالې ټولنې دوامداره مرستې او ګډې هڅې اړینې دي، څو له زیانمنو کورنیو سره پر وخت مرسته وشي او د خلکو د ژوند لومړنۍ اړتیاوې پوره شي