مقاله

برلين: جرمني د بې‌جرمه افغان کډوالو د ایستلو چمتووالی هم نیولی

اشتراک گذاری:

بریانیوز پنجشنبه - ١۸ سرطان ١٤٠٥

د جرمني حکومت راپور ورکړی چې د دغه هېواد حکومت غواړي د جرمي مخینې لرونکو افغان کډوالو تر څنګ، هغه افغانان هم افغانستان ته ولېږي چې هېڅ جرمي سابقه نه لري

د راپور له مخې، دا معلومات په جرمني کې د کډوالو له سیمه‌ییزو شوراګانو سره د ترسره شوې سروې پر بنسټ راټول شوي دي. ویل شوي چې تر اوسه پنځه افغان کډوال، چې کومه جرمي مخینه نه لري، د افغانستان ته د ایستلو په موخه نیول شوي دي

راپور زیاتوي چې له دغو کسانو څخه څلور یې د باواریا ایالت او یو بل یې د هېسن ایالت په توقیف‌خونه کې ساتل کېږي او د ایستلو بهیر ته په تمه دي

د راپور له خپرېدو وروسته د جرمني د کډوالۍ د تګلارې په اړه نوي بحثونه راپورته شوي دي. د کډوالو د حقونو یو شمېر ملاتړو اندېښنه ښودلې او له جرمني حکومت یې غوښتي چې د هرې پرېکړې پر مهال د نړیوالو بشري اصولو او د کډوالو د خوندیتوب معیارونه په پام کې ونیسي

تر اوسه د جرمني حکومت د یاد راپور او د بې‌جرمه افغان کډوالو د ایستلو په اړه رسمي څرګندونې نه دي کړې