سیاست

شنونکي: ټرمپ ولې د ایران جګړې په تړاو تل جنجالي څرګندونې کوي؟

اشتراک گذاری:

بریانیوز شنبه - ۲۰ سرطان ١٤٠٥

واشنګټن – د امریکا ولسمشر ډونلډ ټرمپ د ایران د جګړې او له تهران سره د اړیکو په تړاو په پرله‌پسې ډول داسې څرګندونې کوي چې د نړیوالو رسنیو او سیاسي شنونکو پراخ غبرګونونه راپاروي. نوموړی کله د ایران پر ضد د سختو بندیزونو، پوځي فشار او قاطع دریځ ملاتړ کوي او کله بیا د دواړو هېوادونو ترمنځ د مذاکراتو او ډیپلوماسۍ د بیا پیل خبر ورکوي، هغه څه چې د واشنګټن د پالیسۍ په اړه بېلابېل پوښتنې راپورته کوي

سیاسي شنونکي وایي، ټرمپ د دې تګلارې له لارې هڅه کوي پر ایران سیاسي، اقتصادي او رواني فشار زیات کړي او تهران دې ته وهڅوي چې د امریکا له شرطونو سره سم خبرو اترو ته حاضر شي. د دوی په باور، د سختو څرګندونو او د مذاکراتو د وړاندیزونو یوځای کول د ټرمپ د مذاکره‌ییزې ستراتیژۍ مهمه برخه ده، څو سیال لوری د امریکا د راتلونکو ګامونو په اړه په ناڅرګند حالت کې وساتي

خو یو شمېر منتقدین باور لري چې دا ډول متضاد او جنجالي څرګندونې د دواړو هېوادونو ترمنځ د باور فضا کمزورې کوي او ښايي د سیمې امنیتي وضعیت نور هم پېچلی کړي. سره له دې، ځینې کارپوهان وایي چې ټرمپ د همدې فشار او ډیپلوماسۍ ګډ سیاست ته د خپلو بهرنیو اړیکو د مدیریت د مهمې وسیلې په سترګه ګوري