په افغانستان کې بېوزلي؛ وچه ډوډۍ او د لسو ماشومانو د یوه پلار د ژوند سخته مبارزه

اشتراک گذاری:

بریانیوز - جمعه ٢۶ سرطان ١٤٠٥

کابل – په افغانستان کې د اقتصادي ستونزو او بېوزلۍ دوام د زرګونو کورنیو ژوند له سختو ننګونو سره مخ کړی دی. د هېواد په بېلابېلو سیمو کې ګڼې کورنۍ د خپلو لومړنیو اړتیاوو د پوره کولو توان نه لري او د ورځې یوازې د یوې وچې ډوډۍ په برابرولو خپل ژوند تېروي

د دغو کورنیو له ډلې یو پلار، چې د لسو ماشومانو سرپرستي پر غاړه لري، وايي د بېکارۍ، لوړو بیو او د عاید د نشتوالي له امله یې ژوند تر بل هر وخت سخت شوی دی. هغه زیاتوي، ځینې ورځې داسې هم وي چې د خپلې کورنۍ لپاره د خوړو برابرولو وس نه لري او ماشومان یې د لوږې شپې سبا کوي

نوموړی وایي، یوازینۍ هیله یې دا ده چې د کار فرصت ومومي، څو وکولای شي خپلو ماشومانو ته د ژوند لومړنۍ اړتیاوې برابرې کړي او هغوی له لوږې او بېوزلۍ وژغوري

د ملګرو ملتونو او بشري مرستندویه بنسټونو د راپورونو له مخې، لا هم میلیونونه افغانان بشري مرستو ته اړتیا لري او بېوزلي، بېکاري او د ژوند د لګښتونو لوړوالی د هېواد د ډېرو کورنیو لپاره ستره ستونزه پاتې ده

بېوزله کورنۍ له حکومت، مرستندویه ادارو او نړیوالې ټولنې غواړي چې د بېکارۍ د کمولو، د کارموندنې د فرصتونو د رامنځته کولو او د اړمنو کورنیو د ملاتړ لپاره خپلې هڅې پراخې کړي