هرات د برښنا له سخت بحران سره مخ؛ خلک د پرله‌پسې پرچاوۍ، لوړو بلونو او د خدماتو له خرابوالي شکایت کوي

اشتراک گذاری:

هرات کې د برښنا پرله‌پسې پرې کېدو او د لوړ شویو بلونو له امله د خلکو شکایتونه زیات شوي

بریانیوز- دوشنبه ٢٩ سرطان ١٤٠٥

د هرات ولایت یو شمېر اوسېدونکي د برښنا د دوامدارو پرې کېدو، د برښنا د لوړ شویو بلونو او د خدماتو د ټیټ کیفیت په اړه شکایت کوي او وایي چې له اوږدې مودې راهیسې له دې ستونزو سره مخ دي.

د خلکو په وینا، سره له دې چې هرات له ترکمنستان او ایران څخه وارداتي برښنا ترلاسه کوي او په ولایت کې د برښنا د تولید او زیربناوو د پراختیا لپاره هم پروژې عملي شوې دي، خو د برښنا کیفیت د ښه کېدو پر ځای کمزوری شوی او د اوړي له پیل سره د برښنا پرې کېدل نور هم زیات شوي دي.

د هرات اوسېدونکي وایي، د برښنا پرله‌پسې پرې کېدو د خلکو ورځنی ژوند، سوداګریز فعالیتونه او کوچني کاروبارونه له جدي ستونزو سره مخ کړي دي. د دوی په خبره، د برښنا شرکت له لوري د برښنا بلونه هم د پخوا په پرتله لوړ شوي، خو د خدماتو په کیفیت کې کوم څرګند ښه والی نه لیدل کېږي.

بل لور ته، یو شمېر اوسېدونکي ادعا کوي چې د هرات د برښنا شرکت رئیس، خیرالله معراج، په مالي فساد کې ښکېل دی او هغه بودجه چې باید د برښنا د شبکې د پراختیا او ترمیم لپاره ولګول شي، په سمه توګه نه مصرفېږي.

د هرات خلکو له مسؤلو ادارو غوښتي چې د برښنا د پرله‌پسې پرې کېدو لاملونه روښانه کړي، د خلکو شکایتونو ته جدي پاملرنه وکړي او د فساد د ادعاوو په اړه شفافه او بې‌طرفه څېړنه ترسره کړي.