اخبار جهان

د فرانسې تاریخي ګرمۍ څپې له ۲۱ زرو ډېر کسان مړه کړي

اشتراک گذاری:

د فرانسې د عامې روغتیا ادارې اعلان کړی چې د روان کال د جون میاشتې د بې سارې ګرمۍ څپې پر مهال په دغه هېواد کې ۲۱ زره او ۶۷۴ کسان مړه شوي، چې دا د معمول په پرتله د ۵ زره او ۷۶۴ اضافي مړینو ښکارندويي کوي.

بریانیوز - پنجشنبه، ١ اسد ١٤٠٥

د ادارې د معلوماتو له مخې، د جون له ۱۷مې څخه د جولای تر ۲مې پورې په هغو سیمو کې چې د سختې ګرمۍ له څپې اغېزمنې شوې وې، د مړینو کچه ۳۶ سلنه لوړه شوې ده. چارواکي وايي، دا له ۲۰۰۳ کال راهیسې د فرانسې د هرې ګرمۍ څپې تر ټولو لوړه د مړینو کچه ده.

راپور زیاتوي، چې د جون په ۲۴مه او ۲۵مه فرانسې د خپل تاریخ تر ټولو ګرمې ورځې تجربه کړې، او په ګڼو سیمو کې د تودوخې درجه له ۴۰ سانتي ګراد څخه واوښته.

د روغتیايي چارواکو په وینا، ډېری مړینې د زړو خلکو په ساتنځایونو کې ثبت شوې او قربانیان هم تر ډېره هغه زاړه کسان وو چې د سختې ګرمۍ پر وړاندې یې د مقاومت توان له لاسه ورکړی و.

د راپور له مخې، پلازمېنه پاریس د دې ګرمۍ له څپې تر ټولو ډېره اغېزمنه سیمه بلل شوې ده.