سفر

آلمان: جرمني د افغانستان د نورو وګړو د ایستلو لپاره لاره هواروي

اشتراک گذاری:

بریانیوز- پنجشنبه، ۱- اسـد ١٤٠٥

د جرمني د هسن ایالت د کورنیو چارو وزارت ویلي، فدرالي حکومت داسې زمینه برابره کړې چې له مخې به یې د افغانستان د نورو وګړو د ایستلو بهیر پراخ شي او دا بهیر به یوازې پر مجرمینو او هغو کسانو محدود نه وي چې امنیتي ګواښ بلل کېږي

د هسن د کورنیو چارو وزیر رومان پوزک ویلي، د مجرمینو ایستل لا هم د حکومت له مهمو لومړیتوبونو څخه دي، خو له دې وروسته هغه افغان وګړي هم چې د جرمني له خاورې د وتلو مکلف ګڼل کېږي، ښايي بېرته افغانستان ته ولېږدول شي

نوموړي ویلي، د ایستلو پرېکړې به د هر کس د قانوني وضعیت له ارزونې وروسته ترسره کېږي او هغه کسان به په پام کې ونیول شي چې د جرمني د پاتې کېدو قانوني اجازه نه لري

بل لور ته، د هسن د کډوالو شورا د دې پرېکړې مخالفت کړی او دا یې «بې‌مسؤلیته» اقدام بللی دی. دغه شورا ویلي، د افغان وګړو ایستل د بشري حقونو له اصولو سره په ټکر کې دي او باید د هر کس وضعیت په جلا ډول وارزول شي

د افغانستان د وګړو د بېرته ستنولو موضوع په داسې حال کې مطرح کېږي چې د اروپا په یو شمېر هېوادونو کې د کډوالۍ، امنیت او بېرته ستنولو په اړه بحثونه زیات شوي دي