مقاله

په مزارشریف کې د شمال لوېدیځ زون د امنیتي همغږۍ اتمه ناسته ترسره شوه

اشتراک گذاری:

بریانیوز - جمعه، ۲ اسد ١٤٠٥

مزارشریف – د بلخ ولایت په کوربتوب د شمال لوېدیځ زون د پنځو ولایتونو د واليانو، امنیه قومندانانو، د استخباراتو د مشرانو او نورو امنیتي مسئولانو د همغږۍ اتمه ناسته د بلخ والي محمد یوسف وفا په مشرۍ په مزارشریف ښار کې ترسره شوه

د بلخ ولایت د خبرپاڼې له مخې، په دې غونډه کې د سیمې د امنیتي وضعیت، د نشه‌یي توکو د مخنیوي، د ولایتونو ترمنځ د امنیتي ادارو د همغږۍ، د لویو لارو د خوندي ساتنې او د اسلامي امارت د مشرتابه د فرمانونو د عملي کېدو په اړه هر اړخیزې خبرې وشوې

همدارنګه د ګډونوالو له لوري د خپلو ولایتونو امنیتي راپورونه وړاندې شول او د شته ننګونو، لاسته راوړنو او د ګډو همکاریو د پیاوړتیا په اړه نظرونه تبادله شول

د بلخ والي محمد یوسف وفا ویلي، د دغو ناستو اساسي موخه د امنیت ټینګښت، د خلکو ستونزو ته پر وخت رسېدنه، د ادارو ترمنځ د همغږۍ زیاتول او د ګډو ستونزو لپاره د اغېزمنو حل‌لارو موندل دي

نوموړي له ټولو امنیتي مسئولانو وغوښتل چې خپلې نیمګړتیاوې او اړتیاوې په ډاګه کړي، څو د ګډو هڅو او همغږۍ له لارې ورته مناسبې حل‌لارې وموندل شي او په ټوله سیمه کې امنیتي چارې لا پیاوړې شي