سیاست

محمود خان اڅکزی: د افغانستان د لارو تړل زرګونه کورنۍ له سختو ستونزو سره مخ کړې دي

اشتراک گذاری:

بریانیوز/ جمعه( ۱۶ / اسد /۱۴۰۵هـ.ش)

اسلام‌اباد – د پاکستان مخکښ سیاستوال محمود خان اڅکزي ویلي، د افغانستان پر لارو او سرحدي دروازو محدودیتونو او تړل کېدو زرګونه کورنۍ له اقتصادي او بشري ستونزو سره مخ کړې دي

اڅکزي ویلي، د کابل او اسلام‌اباد ترمنځ له څو میاشتو راهیسې د روان کړکېچ او خونړیو نښتو له امله د دواړو هېوادونو ترمنځ سوداګري، تګ راتګ او د خلکو ورځنی ژوند سخت اغېزمن شوی دی

هغه ټینګار کړی چې د پاکستان حکومت باید د افغانستان په اړه خپلې تګلارې له سره وارزوي او داسې حل‌لاره غوره کړي چې د دواړو هېوادونو د خلکو او سوداګرو ستونزې راکمې کړي

په وروستیو اوونیو کې په پاکستان کې د سیاستوالو، سوداګرو او مدني فعالانو له لوري هم د افغانستان پر وړاندې د اسلام‌اباد د تګلارې د بیاکتنې غوښتنې زیاتې شوې دي. دوی باور لري چې د سرحدي لارو اوږدمهاله تړل د زرګونو کورنیو پر ژوند، سوداګرۍ او سیمه‌ییز اقتصاد منفي اغېز کړی دی

دا څرګندونې داسې مهال کېږي چې د کابل او اسلام‌اباد اړیکې لا هم له امنیتي او سیاسي کړکېچونو سره مخ دي او د دواړو هېوادونو ترمنځ د سرحدي تګ راتګ په اړه محدودیتونه پر خپل ځای پاتې دي