ملګري ملتونه: د افغان نجونو د زده‌کړو دوامدار بندیز د افغانستان تر ټولو ستره ستونزه ده

ملګري ملتونه: د افغان نجونو د زده‌کړو دوامدار بندیز د افغانستان تر ټولو ستره ستونزه ده

 بریانیوز/ جمعه ( ۲۳ / اسد /۱۴۰۵هـ.ش)

 ملګرو ملتونو په افغانستان کې د نجونو د زده‌کړو پر دوامدار بندیز یو ځل بیا ژوره اندېښنه څرګنده کړې او د میلیونونو افغان نجونو له زده‌کړو محرومیت یې د هېواد د اوسني وضعیت له تر ټولو جدي او دردونکو برخو څخه بللی دی

د ملګرو ملتونو اړوند د یونېسکو د نویو شمېرو له مخې، اوس مهال شاوخوا ۲.۴ میلیونه افغان نجونې له ثانوي او لوړو زده‌کړو بې‌برخې دي. دغه بندیزونه د طالبانو له واک ته رسېدو وروسته پرله‌پسې دوام لري

ملګرو ملتونو ویلي، د نجونو او ښځو پر زده‌کړو او کار د محدودیتونو دوام نه یوازې د هغوی پر شخصي ژوند اغېز کړی، بلکې د افغانستان په ټولنیز او اقتصادي ژوند کې یې د ښځو ونډه هم په بې‌ساري ډول کمه کړې ده

د ملګرو ملتونو په وینا، د ښځو او نجونو له زده‌کړو او کاري فرصتونو محرومول د هېواد د راتلونکي لپاره هم جدي پایلې لري، ځکه د ټولنې یوه لویه برخه له مسلکي زده‌کړو، کار او د تصمیم نیونې له بهیر څخه لرې پاتې کېږي

نړیوالو بنسټونو په وار وار له طالبانو غوښتي چې د نجونو پر مخ د منځنیو ښوونځیو او پوهنتونونو دروازې بېرته پرانیزي او افغان ښځو او نجونو ته د زده‌کړې او کار حق ورکړي

خو تر اوسه د طالبانو حکومت د نجونو د ثانوي او لوړو زده‌کړو د بېرته پیل لپاره کومه روښانه نېټه نه ده اعلان کړې

ملګري ملتونه ټینګار کوي چې د افغان نجونو د زده‌کړې حق باید خوندي شي او د هغوی محرومیت باید نور دوام ونه کړي. د دې سازمان په باور، د افغانستان د راتلونکي پرمختګ لپاره د ښځو او نجونو تعلیم او فعال ګډون بنسټیز اهمیت لري