مقاله

اسلام آباد: خیبر پښتونخوا کې له افغان کډوالو سره د ناقانونه اسنادو په جوړولو کې د ۱۴ زره دولتي کارکوونکو د لاس لرلو ادعا

اشتراک گذاری:

بریانیوز/ جمعه ( ۲۳ / اسد /۱۴۰۵هـ.ش)

د خیبر پښتونخوا چارواکي وايي، د هغو شاوخوا ۱۴ زره دولتي کارکوونکو پر وړاندې اقدام شوی چې له افغان کډوالو سره یې د ناقانونه اسنادو په جوړولو او برابرولو کې د مرستې ادعا شوې ده

ځایي چارواکو ویلي، دغه کسان په پېښور او د خیبر پښتونخوا په بېلابېلو ولسوالیو کې پېژندل شوي او د هغوی د احتمالي لاس لرنې په اړه قانوني او اداري اقدامات پیل شوي دي

د چارواکو په وینا، ځینو دولتي کارکوونکو له خپل رسمي صلاحیت څخه په ناسمه ګټه اخیستنې سره افغان کډوالو ته د داسې اسنادو په برابرولو کې مرسته کړې چې د قانون له مخې یې د ترلاسه کولو شرایط نه لرل

چارواکي وايي، د اسنادو د جعل او ناقانونه برابرولو د مخنیوي لپاره به د اړوندو ادارو د کارکوونکو فعالیتونه لا زیات وڅارل شي او له سرغړوونکو سره به د قانون له مخې چلند وشي

دا اقدام په داسې مهال کېږي چې پاکستان په وروستیو میاشتو کې د بې‌اسنادو بهرنیانو، په ځانګړي ډول افغان کډوالو، د اسنادو د څېړنې او د هغوی د قانوني وضعیت د معلومولو بهیر سخت کړی دی

د افغان کډوالو د اسنادو د وضعیت ترڅنګ، په پاکستان کې د هغوی د نیولو او ستنولو بهیر هم د بشري حقونو د سازمانونو له خوا له اندېښنو سره مخ شوی دی