سیاست

طالبان: اشرف غني کولی شي افغانستان ته راستون شي

اشتراک گذاری:

بریانیوز/ جمعه ( ۲۳ / اسد /۱۴۰۵هـ.ش)

د طالبانو ویاند ویلي چې د افغانستان پخوانی ولسمشر اشرف غني کولی شي هېواد ته بېرته راستون شي او د هغه د راتګ لپاره له طالبانو سره د اړیکې نیولو اړتیا نشته

د طالبانو ویاند زیاته کړې چې د اشرف غني نږدې کسانو ته هم عمومي عفوه شوې او هغوی کولی شي افغانستان ته راستانه شي. نوموړي ټینګار کړی چې د پخواني ولسمشر او د هغه د نږدې کسانو د بېرته راتګ پر وړاندې کومه ستونزه نه شته

د طالبانو د ویاند په وینا، ټول افغانان حق لري چې په خپل هېواد کې ژوند وکړي او د دوی حکومت هېڅ افغان خپل دښمن نه ګڼي

دا څرګندونې په داسې مهال کېږي چې څو ورځې وړاندې د پخواني ولسمشر اشرف غني تره، عبدالقیوم کوچي، ادعا کړې وه چې د طالبانو ځینو چارواکو ترې غوښتي چې له اشرف غني سره اړیکه ونیسي او هغه افغانستان ته د بېرته ستنېدو لپاره وهڅوي

تر اوسه اشرف غني په رسمي ډول د طالبانو د دې تازه څرګندونو په اړه خپل دریځ نه دی څرګند کړی

اشرف غني د ۲۰۲۱ کال د اګست په ۱۵مه، د طالبانو له ننوتلو سره هممهاله، له افغانستان څخه ووت او له هغه وروسته په بهر کې ژوند کوي. د هغه د بېرته ستنېدو موضوع له هغه وخت راهیسې د افغانستان په سیاسي بحثونو کې مطرح شوې ده