سیاست

فرید حمیدي: د طالبانو پر وړاندې ولسي او وسله‌ وال مخالفتونه زیات شوي

اشتراک گذاری:

بریانیوز/ جمعه ( ۲۳ / اسد /۱۴۰۵هـ.ش)

د افغانستان پخوانی لوی څارنوال فرید حمیدي وايي، د طالبانو د حکومت د «ظلم، تبعیض او بې‌عدالتۍ» پر وړاندې ولسي او وسله‌وال مخالفتونه په بې‌ ساري ډول زیات شوي دي

حمیدي په یوه تازه مرکه کې ویلي، د طالبانو هغه ادعاوې چې ګواکې په افغانستان کې جګړه پای ته رسېدلې، له واقعیت سره سمون نه لري. د نوموړي په وینا، هېواد یو ځل بیا د یوې اوږدې جګړې پر لور د تګ له خطر سره مخ دی

هغه د طالبانو د واکمنۍ د تېرو پنځو کلونو پر مهال د عدلي او قضايي بنسټونو وضعیت هم سخت غندلی او ادعا یې کړې چې په هېواد کې خپلواک عدلي او قضايي جوړښتونه له منځه تللي دي

حمیدي همداراز د هغه څه په اړه اندېښنه څرګنده کړې چې نوموړي یې «صحرايي وژنې» بللې او ویلي یې دي چې له قانوني بهیر پرته د خلکو د وژلو پېښې لا هم دوام لري

د افغانستان پخواني لوی څارنوال ټینګار کړی چې د طالبانو «استبدادي سیاستونه» د خلکو نارضایتي زیاته کړې ده. هغه ادعا کړې چې د اوسني وضعیت په دوام سره د حکومت پر وړاندې د مخالفتونو د لا پراخېدو احتمال شته

تر اوسه طالبانو د فرید حمیدي د دغو څرګندونو په اړه رسمي غبرګون نه دی ښودلی. طالبان بیا په وار وار ویلي چې په افغانستان کې عمومي امنیت ټینګ دی او د جګړې دوره پای ته رسېدلې ده