سیاست

د ترکیې ولسمشراردوغان: د هرمز تنګي بیا پرانیستل د ترکیې لپاره لومړیتوب لري

اشتراک گذاری:

بریانیوز/سه شنبه ( ۲۶ / اسد /۱۴۰۵هـ.ش)

انقره – د ترکیې ولسمشر رجب طیب اردوغان وايي، د هرمز تنګي بیا پرانیستل د انقرې له مهمو لومړیتوبونو څخه دي او د دغه ستراتیژیک سمندري مسیر تړلی پاتې کېدل هېڅ هېواد ته ګټه نه رسوي

اردوغان ټینګار کړی چې د هرمز تنګي اوږدمهاله تړل کېدل د نړیوالې سوداګرۍ او د انرژۍ د لېږد لپاره جدي ګواښ رامنځته کولای شي. نوموړي غوښتنه کړې چې دغه مهمه سمندري لار باید ژر تر ژره بېرته پرانیستل شي

د ترکیې ولسمشر ویلي، د هرمز تنګي امنیت او د بېړیو د تګ راتګ دوام یوازې د سیمې د هېوادونو لپاره نه، بلکې د نړیوال اقتصاد لپاره هم مهم دی

د اردوغان څرګندونې په داسې مهال کېږي چې په دې وروستیو کې د هرمز تنګي پر سر د ایران او امریکا د چارواکو ترمنځ لفظي تاوتریخوالی زیات شوی دی

هرمز تنګی د نړۍ د انرژۍ د لېږد له مهمو سمندري مسیرونو څخه ګڼل کېږي او د دغه تنګي هر ډول اوږدمهاله بندښت کولای شي د نړیوالو بازارونو، د تېلو بیو او سوداګریزو لارو پر وضعیت د پام وړ اغېز وکړي