سیاست

فضل‌الرحمن: افغانستان او پاکستان باید ګډ راتلونکی جوړ کړي

اشتراک گذاری:

بریانیوز/سه شنبه ( ۲۶ / اسد /۱۴۰۵هـ.ش)

اسلام‌اباد – د جمعیت علمای اسلام پاکستان مشر مولانا فضل‌الرحمن وايي، د افغانستان او پاکستان ترمنځ تاریخي، دیني او فرهنګي اړیکې دواړه هېوادونه دې ته هڅوي چې د پیاوړو او سوله‌ییزو ګاونډیانو په توګه خپل ګډ راتلونکی جوړ کړي

فضل‌الرحمن دا څرګندونې په اسلام‌اباد کې د افغانستان سفارت له لوري د اسد د ۲۴مې په مناسبت جوړو شویو مراسمو کې کړې دي

نوموړي ټینګار کړی چې د دواړو هېوادونو ترمنځ ګډ تاریخي او فرهنګي تړاوونه باید د اختلافاتو د زیاتولو پر ځای د متقابلې همکارۍ، سولې او سیمه‌ییز ثبات د پیاوړتیا لپاره وکارول شي

هغه ویلي، افغانستان او پاکستان د جغرافیایي نږدېوالي ترڅنګ له خلکو، دیني ارزښتونو او تاریخي اړیکو سره هم ژور تړاو لري او د دواړو هېوادونو ترمنځ سوله او ثبات د ټولې سیمې پر امنیت او اقتصادي پرمختګ مثبت اغېز لرلای شي

د فضل‌الرحمن څرګندونې په داسې مهال کېږي چې د کابل او اسلام‌اباد اړیکې له امنیتي او سیاسي ننګونو سره مخ دي او د دواړو لورو ترمنځ د اختلافاتو د حل لپاره د خبرو او متقابل تفاهم پر اړتیا ټینګارونه زیات شوي دي