د افغانستان پراخې معدني زیرمې؛ بهرني هېوادونه یې د «بې‌سرپوښه دیګ» په څېر د استفادې په لټه کې دي

د ایران د صنعت، کانونو او سوداګرۍ وزارت مرستیال او د ځمکپوهنې او معدني اکتشافاتو سازمان رئیس، محمود فاطمي عقدا، وايي چې د افغانستان د معدني سرچینو د ظرفیتونو د پېژندنې او د معلوماتو بانک د جوړولو لپاره مطالعات پیل شوي دي.

بریانیوز- یکشنبه ٢ سنبله ١٤٠٥

فاطمي عقدا ویلي، د افغانستان د کانونو د ظرفیتونو پېژندنه د دوی د ادارې په کاري لومړیتوبونو کې شامله شوې او په دې برخه کې عملي مطالعات پيل شوي دي.

نوموړي افغانستان د ایران د کانونو په برخه کې د ډیپلوماسۍ له مهمو هدفونو څخه بللی او ویلي یې دي چې د دواړو هېوادونو ترمنځ د ځمکپوهنې علومو او معدني اکتشافاتو په برخو کې د همکاریو د پراختیا لپاره، د اقتصادي همکاریو سازمان «اکو» په چوکاټ کې هم هڅې په جدي توګه روانې دي.

هغه زیاته کړې چې د دغو همکاریو پراختیا کولای شي د دواړو هېوادونو د صنعتونو لپاره د اړتیا وړ خامو موادو د دوامدارې برابرۍ زمینه برابره کړي.

د ایران د ځمکپوهنې او اکتشافاتو سازمان رئیس ویلي، په نړۍ کې د پېژندل شویو ۱۱۴ ډوله معدني موادو له ډلې شاوخوا ۳۵ ډولونه په ایران کې موندل شوي، خو د دغه هېواد اوسني اکتشافات لا هم له موجودو واقعي ظرفیتونو سره د پام وړ واټن لري.

د هغه په وینا، د دې واټن د کمولو او د نفتو له عوایدو څخه د ایران د وابستګۍ د راکمولو لپاره ۶۶ نوي اکتشافي پروژې تعریف شوې او د خصوصي سکټور د لا پراخ حضور لپاره هم زمینه برابره شوې ده.

فاطمي عقدا همداراز د ستراتېژیکو عناصرو او نادرو خاورو د موندلو اهمیت ته په اشارې ویلي چې د ځمکې د ناستې یا فرونشست د ستونزې مدیریت هم د ځمکپوهنې په برخه کې له حیاتي لومړیتوبونو څخه دی. نوموړي ویلي، د ځمکې د ناستې له مهمو لاملونو څخه یو هم د ځمکې لاندې اوبو له زېرمو څخه له حده زیات برداشت دی.