سیاست

اسد قیصر: د افغانستان پولې تړل کېدو خیبر پښتونخوا له سخت اقتصادي بحران سره مخ کړې

اشتراک گذاری:

بریانیوز دوشنبه ( ۱۶/ سنبله /۱۴۰۵هـ.ش)

د پاکستان د «اساسي قانون د ساتنې غورځنګ» عمومي منشي او د تحریک انصاف مشر اسد قیصر وايي، له افغانستان سره د پولې تړل کېدو د خیبر پښتونخوا پر سوداګرۍ او اقتصادي فعالیتونو منفي اغېز کړی او د دغه ایالت خلک له سختو اقتصادي ستونزو سره مخ دي

قیصر ویلي، له افغانستان سره د سوداګریزو لارو اوږدمهاله تړل کېدل یوازې د دواړو هېوادونو پر سوداګرۍ اغېز نه کوي، بلکې په خیبر پښتونخوا کې د کار، سوداګرۍ او عاید پر سرچینو هم مستقیم فشار اچوي. د پاکستان د اپوزیسیون ځینو مشرانو تر دې مخکې هم د افغانستان سره د خبرو او د سوداګریزو اړیکو د بېرته فعالولو غوښتنه کړې ده

نوموړي د پنجاب د وزیراعلیٰ مریم نواز پر وروستیو څرګندونو هم سختې نیوکې کړې دي. مریم نواز ویلي وو چې پنجاب د ګاونډیو هېوادونو په پرتله له خپلو ګاونډیو صوبو څخه له لوی امنیتي ګواښ سره مخ دی؛ دغو څرګندونو په خیبر پښتونخوا کې د تحریک انصاف د مشرانو توند غبرګونونه راپارولي دي

اسد قیصر ویلي، مریم نواز باید د خیبر پښتونخوا د خلکو په اړه د داسې څرګندونو له امله شرمېدلې وای او د هغې خبرې یې د دغه ایالت د خلکو پر وړاندې سپکوونکې بللې دي

قیصر همداراز ادعا کړې چې د پاکستان د حکومتونو ناسم سیاستونه او د ترهګرۍ پر وړاندې اوږدې جګړې خیبر پښتونخوا ته درانه زیانونه اړولي دي. د هغه په وینا، ناامني، بې‌ځایه کېدل، د سوداګرۍ کمزوري کېدل او اقتصادي ستونزې د دغو پالیسیو له مهمو پایلو څخه دي

دا څرګندونې داسې مهال کېږي چې په خیبر پښتونخوا کې د امنیتي پېښو په تړاو د پاکستان پوځ د وروستیو عملیاتو خبر ورکړی او ویلي یې دي چې د افغانستان له پولې سره نږدې سیمو کې یې ګڼ وسله‌وال وژلي دي. اسلام‌اباد ادعا کوي چې له افغانستان څخه د وسله‌والو د تګ راتګ ستونزه لا هم موجوده ده، خو کابل دغه ډول تورونه ردوي

د افغانستان او پاکستان ترمنځ د امنیتي ترینګلتیا ترڅنګ، د پولې تړل کېدل د دواړو هېوادونو د سوداګرو، ټرانزیټي شرکتونو او سرحدي سیمو پر اقتصاد هم فشار زیات کړی دی. د دواړو لورو ترمنځ د اړیکو د عادي کېدو لپاره د امنیتي ستونزو ترڅنګ د سوداګرۍ او ترانزیټ د لارو د بیا پرانیستلو موضوع هم له مهمو ننګونو څخه ګڼل کېږي