اخبار جهان

اتریش: له ۱۴ کلونو کم عمره نجونې په ښوونځیو کې ټیکری نه شي پر سر کولی

اشتراک گذاری:

بریانیوز سه شنبه ( ۱۷/ سنبله /۱۴۰۵هـ.ش)

ویانا — په اتریش کې د ۱۴ کلونو څخه کم عمره نجونو لپاره په ښوونځیو کې د اسلامي دود له مخې د ټیکري یا حجاب پر سر کولو نوی بندیز عملي شوی دی. دا قانون د سپټمبر له لومړۍ نېټې نافذ شوی او د نوي ښوونیز کال له پیل سره یې عملي پړاو هم پیل شوی دی

د اتریش حکومت وايي، د دې قانون موخه د نجونو د آزادۍ او ځان‌واکۍ ساتنه ده؛ خو د دغه هېواد د مسلمانانو تر ټولو لویې رسمي ټولنې پر دې پرېکړې نیوکه کړې او دا یې د مذهبي حقونو پر وړاندې تبعیضي اقدام بللی دی. دغې ټولنې ویلي چې موضوع به د اتریش اساسي قانون محکمې ته یوسي

د قانون له مخې، که یوه زده‌کوونکې له بندیز څخه سرغړونه وکړي، لومړی به له هغې او د هغې له کورنۍ سره خبرې وشي. د سرغړونې د تکرار په صورت کې د والدینو یا سرپرستانو لپاره له ۱۵۰ تر ۸۰۰ یورو پورې جریمه ټاکل شوې ده

د اتریش د پارلمان له خوا دغه قانون د ۲۰۲۵ کال په ډسمبر کې تصویب شوی و او د واکمن ائتلاف تر څنګ یې د ازادۍ ګوند ملاتړ هم کړی و. د شنو ګوندونو استازو له دې قانون سره مخالفت کړی دی

دا په داسې حال کې ده چې د اتریش اساسي قانون محکمې په ۲۰۲۰ کال کې د لومړنیو ښوونځیو لپاره د حجاب پخوانی بندیز لغوه کړی و او ویلي یې وو چې دغه اقدام د مسلمانانو پر وړاندې د تبعیض له امله له اساسي قانون سره ستونزه لري