مقاله

زلمي خلیلزاد: له سعودي شرکت سره د تېلو تړون د افغانستان لپاره لویه اقتصادي لاسته راوړنه ده

اشتراک گذاری:

بریانیوز چهارشنبه ( ۱۸/ سنبله /۱۴۰۵هـ.ش)

کابل — د افغانستان لپاره د امریکا پخواني ځانګړي استازي زلمي خلیلزاد ویلي چې له سعودي شرکت «ډلټا انټرنشنل» سره د افغانستان د تېلو او ګازو د اکتشاف او استخراج تړون د هېواد د اقتصاد لپاره مهمه لاسته راوړنه ده

دا تړون د سپټمبر پر ۷مه په کابل کې د طالبانو د کانونو او پټرولیم وزارت او د سعودي عربستان د «ډلټا انټرنشنل» شرکت ترمنځ لاسلیک شو. د تړون له مخې، شرکت به د افغانستان په لوېدیځ کې د کشک ـ تیرپل د تېلو او ګازو په حوزه کې د اکتشاف او استخراج چارې ترسره کوي

د رسمي معلوماتو له مخې، د پروژې لومړنۍ پانګونه ۲۰۰ میلیونه ډالره ټاکل شوې او د اکتشاف په لومړي پړاو کې به د کشک سیمې د اوو ګازي بلاکونو ارزونه او پراختیا ترسره شي. دغه حوزه د هرات او بادغیس ولایتونو ترمنځ شاوخوا ۲۲ زره مربع کیلومتره سیمه رانغاړي

خلیلزاد، چې د تړون د لاسلیک په مراسمو کې د طالبانو د یو شمېر مشرانو ترڅنګ حاضر و، دغه هوکړه د افغانستان د لویو پانګونو د جذب لپاره د چمتووالي نښه بللې ده. نوموړي ویلي چې افغانستان د سترو پانګونو د جذب لپاره چمتو دی او د تړون نهایي کېدل یې د هېواد لپاره مثبت پرمختګ ګڼلی دی

د طالبانو د کانونو او پټرولیم وزارت وايي، د دې پروژې موخه یوازې د تېلو او ګازو استخراج نه دی، بلکې د هېواد د انرژۍ اړتیاوو پوره کول، د کار زمینه برابرول او د طبیعي سرچینو له لارې د اقتصادي ودې پیاوړتیا هم دي

په تړون کې د هرات ښار او صنعتي پارک لپاره د طبیعي ګاز د کارونې د امکان‌سنجۍ او همداراز د شاوخوا ۷۰۰ کیلومتره ګاز نل‌لیکې د جوړولو د امکان د ارزونې موضوع هم شامله ده

خلیلزاد په داسې حال کې د دې تړون ستاینه کوي چې د امریکا د بهرنیو چارو وزارت تازه ویلي هغه نور د امریکا د حکومت کارکوونکی نه دی او په افغانستان کې د واشنګټن استازیتوب نه کوي. د امریکا د بهرنیو چارو وزارت ټینګار کړی چې د خلیلزاد اوسني فعالیتونه شخصي دي

د سعودي شرکت او طالبانو ترمنځ د دې هوکړې له امله د افغانستان د طبیعي زېرمو د راتلونکي، د بهرنیو پانګونو د پراخېدو او د انرژۍ د کورني تولید په اړه هم تمې زیاتې شوې دي؛ خو د پروژې عملي پایلې به تر ډېره د اکتشاف پایلو، تخنیکي ارزونو او د پانګونې د ژمنو پر عملي کېدو پورې تړلې وي