سیاست

نیویارک: د ترهګرۍ پر وړاندې د نړیوالې همکارۍ پیاوړتیا اړینه ده

اشتراک گذاری:

بریانیوز شنبه (۲۱/ سنبله /۱۴۰۵هـ.ش)

د ملګرو ملتونو په امنیت شورا کې د سپټمبر د ۱۱مې بریدونو د کلیزې په مناسبت جوړه شوې غونډه کې د ملګرو ملتونو لپاره د امریکا دایمي استازي مایک والټز د ترهګرۍ پر وړاندې د نړیوالې همکارۍ پر پیاوړتیا ټینګار کړی دی

والټز ویلي، ترهګري باید په مستقیم ډول وځپل شي، د ترهګرو ډلو مالي سرچینې او ملاتړ باید پرې شي او هېوادونه باید د احتمالي ترهګریزو ګواښونو د مخنیوي لپاره استخباراتي معلومات له یو بل سره شریک کړي

هغه ټینګار کړی چې ټول هېوادونه باید د ترهګرۍ پر وړاندې خپلې مبارزې ته تر هغه وخته دوام ورکړي چې دا ګواښ په بشپړه توګه له منځه ولاړ نه شي

په غونډه کې د بریتانیا د ولسي جرګې غړي او د حکومت مرستیال وزیر کریس المور هم خبرې کړې او د ترهګرۍ پر وړاندې یې د مدني ټولنې، ټکنالوژۍ او مالي برخو ترمنځ د لا نږدې همکارۍ غوښتنه کړې ده

المور ویلي، نړیواله ټولنه باید د ترهګرۍ د مخنیوي په برخه کې له مصنوعي ځیرکتیا څخه هم اغېزمنه ګټه واخلي او د بندیزونو له لارې د ترهګرو ډلو مالي او نور ملاتړ پرې کړي

نوموړي په ورته وخت کې ټینګار کړی چې د ترهګرۍ پر وړاندې ټول اقدامات باید له نړیوال قانون، په ځانګړي ډول د نړیوالو بشري حقونو، سره سم ترسره شي. د ملګرو ملتونو پخوانیو پرېکړو هم د ترهګرۍ ضد اقداماتو پر مهال د نړیوال قانون او بشري حقونو د رعایت غوښتنه کړې ده