اخبار جهان

نيويارک: د سمندري لېږد لګښتونو زیاتوالي د امریکا د درنو خامو تېلو صادرات کم کړي

اشتراک گذاری:

(بریانیوز سه شنبه (۲۱/ میزان /۱۴۰۵هـ.ش

د سمندري لېږد د لګښتونو بې‌ساري زیاتوالي د امریکا د لویې وچې د درنو خامو تېلو صادرات کم کړي او په پایله کې یې د دغو تېلو زېرمې زیاتې شوې دي دا په داسې حال کې ده، چې په اسیا او اروپا کې د تېلو د عرضې کمښت دوام لري او د نړۍ په بازارونو کې د یوه بېرل تېلو بیه لا هم له ۱۰۰ ډالرو لوړه ده

د خپاره شوي راپور له مخې، د امریکا له لویې وچې څخه اسیا ته د تېلو د لېږد لګښت د هر تېل‌وړونکي بېړۍ لپاره له ۸۰ میلیونه ډالرو اوښتی دی؛ په داسې حال کې چې د روان کال په پیل کې دغه لګښت شاوخوا له ۱۰ تر ۱۵ میلیونه ډالرو پورې و

د لېږد لګښتونو دغه ستر زیاتوالی د تېلو پر نړیوال سوداګریز بهیر فشار راوړی او د امریکا د درنو خامو تېلو د صادراتو پر بهیر یې منفي اغېز کړی دی. د لېږد د لګښتونو لوړېدل د پېرودونکو لپاره د تېلو وروستی قیمت هم زیاتوي او د واردوونکو هېوادونو پر لګښتونو فشار اچوي

بلخوا، د راپور له مخې، د امریکا د تېلو چاڼ‌ځایونه نږدې په خپل بشپړ ظرفیت فعالیت کوي او د تېلو د لا زیاتو حجمونو د چاڼولو وړتیا نه لري. له همدې امله، د کورنیو چاڼ‌ځایونو محدود ظرفیت هم د اضافي خامو تېلو د جذب مخه نیسي

په نړیوال بازار کې د تېلو د عرضې او لېږد ستونزې په داسې وخت کې زیاتې شوې دي، چې اسیايي او اروپايي هېوادونه د تېلو له کمښت سره مخ دي. د لېږد د لګښتونو دوامداره لوړوالی او د عرضې محدودیتونه کولای شي د انرژۍ پر نړیوال بازار فشار وساتي او د تېلو د بیو د لوړېدو لامل شي