ایران د افغانستان د وضعیت په اړه د سیمې د مهمې ناستې کوربه‌توب کوي

ایران اعلان کړی چې راتلونکې اوونۍ به د افغانستان د روان وضعیت په اړه د یوې مهمې سیمه‌ییزې ناستې کوربه وي؛ هغه ناسته چې پکې د افغانستان د ګاونډیو هېوادونو استازي ګډون کوي او د سیمې پر امنیتي بدلونونو، سیاسي ثبات او ګډو اندېښنو به هر اړخیز بحث وشي

د ایران د بهرنیو چارو وزارت ویاند، اسماعیل بقایي، ویلي دي چې د دې ناستې اساسي موخه د سیمې د هېوادونو ترمنځ سلا مشورې پیاوړې کول او د افغانستان د وضعیت په اړه ګډ درک رامنځته کول دي. د هغه په وینا، ګډونوال هېوادونه به د پولې امنیت، د ترهګرۍ د ګواښونو، ناقانونه کډوالۍ او د اقتصادي بې‌ثباتۍ پر اغېزو تمرکز وکړي

دا ناسته په داسې وخت کې جوړېږي چې افغانستان د طالبانو د ادارې تر واک لاندې له ګڼو کورنیو او نړیوالو ننګونو سره مخ دی. اقتصادي رکود، پراخ فقر، د بنسټیزو حقونو محدودیتونه او نړیوال انزوا هغه ستونزې دي چې نه یوازې د افغانستان خلک، بلکې د سیمې هېوادونه هم اندېښمن کړي دي. له همدې امله، د تهران ناسته د ګاونډیو هېوادونو لپاره یو فرصت بلل کېږي څو خپلې مشروع اندېښنې، په ځانګړي ډول د سرحدي امنیت او د افغان وګړو د وضعیت په اړه، په ښکاره ډول مطرح کړي

سیاسي شنونکي باور لري چې دا ډول سیمه‌ییزې ناستې کولی شي د همغږۍ او ګډ اقدام لپاره لاره هواره کړي، خو اصلي پوښتنه لا هم پر خپل ځای پاتې ده: ایا د افغانستان د خلکو غږ به په رښتیا واورېدل شي؟ او ایا له دې ناستو وروسته به عملي ژمنې وشي چې د افغانانو د ژوند شرایط بدل کړي؟

د افغانستان خلک، چې له کلونو جګړو او بې‌ثباتۍ ستړي دي، له سیمې او نړیوالې ټولنې تمه لري چې یوازې په خبرو بسنه ونه کړي، بلکې د سولې، ثبات او بشري حقونو د ټینګښت لپاره عملي ګامونه واخلي. د تهران ناسته که د رښتینې ارادې او صادقانه همکارۍ پر بنسټ پرمخ ولاړه شي، ښايي د افغانستان د راتلونکي لپاره د هیلې یو نوی باب پرانیزي