واشنګټن امریکايي مقام: نتنياهو په نړيواله کچه منفور او سياسي انزوا ته ورټيل وهل شوی

يو لوړپوړي امريکايي مقام د «اکسيوس» خبري وېب‌ سايټ سره په خبرو کې ويلي، چې د اسرائيلو صدراعظم بنيامين نتنياهو په تېرو دوو کلونو کې په نړيواله کچه خپل سياسي اعتبار له لاسه ورکړی او اوس د نړۍ په ډيپلوماټيکو کړيو کې يو منزوي او ناپسند څېره بلل کېږي

د دغه مقام په وينا، د نتنياهو سخت‌دريځې پاليسۍ، دوامدارې جګړې او د سولې له بهير څخه شا ګرځول، د دې لامل شوي چې ګڼ نړيوال مشران ورسره د اړيکو له پراخولو ډډه وکړي. هغه زياته کړه چې د مصر د ولسمشر عبدالفتاح السيسي نه‌لېوالتيا د نتنياهو سره د مخامخ ليدنې لپاره، د هغه د سياسي انزوا يو څرګند مثال دی

سرچينه همداراز يادونه کوي چې د متحده عربي اماراتو له‌خوا د نتنياهو نه‌بلل کېدل، سره له دې چې د ابراهيم تړونونو له لاسليک څخه پنځه کاله تېر شوي، د دې ښکارندويي کوي چې د اسرائيلو اوسنی مشرتابه د سيمې او نړۍ په کچه له بې‌باورۍ سره مخ دی

شنونکي باور لري چې د نتنياهو حکومت د غزې جګړې، د ملکي وګړو مرګ‌ژوبلې، او د نړيوالو قوانينو پر وړاندې بې‌پروا چلند له امله د نړۍ د عامه افکارو سخت غبرګون راپارولی دی. د دوی په اند، دا حالت نه يوازې د اسرائيلو بهرنۍ اړيکې کمزورې کړې، بلکې د تل‌ابيب ستراتيژيک ملګري يې هم له سياسي فشار سره مخ کړي دي

په پاى کې امريکايي مقام ټينګار کړی چې که د اسرائيلو مشرتابه خپله تګلاره بدله نه کړي، نو دا سياسي انزوا به لا نوره هم ژوره شي او ښايي د سيمه‌ييزو او نړيوالو اړيکو پر راتلونکي يې اوږدمهاله منفي اغېزې پرېږدي