په غزه کې د نسل‌ وژنې جګړې د شهیدانو شمېر ۷۰ زره او ۶۶۵ تنو ته ورسېد

غزه:

د غزې په تړانګه کې د فلسطين د عامې روغتيا وزارت اعلان کړی، چې د صهيونيستي اشغالګر رژيم له‌خوا د نسل‌وژنې جګړې له پيل (اکتوبر ۲۰۲۳) راهيسې د شهيدانو شمېر ۷۰ زره او ۶۶۵ تنو ته لوړ شوی او له ۱۷۱ زره څخه زيات کسان ټپيان شوي دي

د ياد وزارت د رسمي شمېرو له مخې، د قربانيانو ډېره برخه ښځې، ماشومان او زاړه کسان دي؛ هغه ملکي وګړي چې د پرله‌پسې بمباريو، کورونو، روغتونونو او کډوالو کمپونو د نښه کېدو له امله يې خپل ژوند له لاسه ورکړی دی. د روغتيا وزارت ټينګار کړی چې د غزې روغتيايي سيستم د شديد فشار لاندې دی او د درملو، طبي تجهيزاتو او سون توکو له سخت کمښت سره مخ دی

د وزارت په وينا، که څه هم د ۲۰۲۵ کال په اکتوبر کې د اوربند اعلان وشو، خو اشغالګر رژيم لا هم خپلو بريدونو ته دوام ورکړی او د بېلابېلو سيمو بمبارۍ، هدفي بريدونه او محاصره يې نه ده درولې. دغه حالت د ملکي وګړو ژوند نور هم له جدي ګواښ سره مخ کړی او د ټپيانو او شهيدانو شمېر هره ورځ زياتوي

نړيوال بشري بنسټونه خبرداری ورکوي چې په غزه کې روان بشري ناورين بې‌ساری دی. د هغوی په اند، د روغتيايي زېربناوو ويجاړېدل، د څښاک د پاکو اوبو نشتوالی او د خوړو کموالی د دې لامل شوی چې زرګونه کسان، په ځانګړي ډول ماشومان، د لوږې او ناروغيو له خطر سره مخ شي

د فلسطين د روغتيا وزارت يو ځل بيا له نړيوالې ټولنې وغوښتل، چې د اشغالګر رژيم پر وړاندې عملي او جدي ګامونه پورته کړي، سمدستي اوربند ټينګ کړي او غزې ته د بشري مرستو د خوندي او دوامدار رسېدو زمينه برابره کړي، تر څو د بې‌ګناه خلکو د وينو توېدل ودرول شي