اسلام‌اباد : آصف دراني: افغانستان د بېلابېلو ترهګرو ډلو د فعاليت پر مرکز بدلېدونکی دی

د افغانستان په چارو کې د پاکستان پخواني ځانګړي استازي آصف دراني خبرداری ورکړی، چې افغانستان په چټکۍ سره د بېلابېلو ترهګرو ډلو د فعاليت پر مرکز بدلېږي او که دا وضعيت تر کنټرول لاندې رانشي، نو د نړۍ په هره برخه کې د ۱۱ سپټمبر په څېر يوه لويه فاجعه تکرارېدای شي

دراني د سه‌شنبې په ورځ، د قوس ۲۵مه، په خپلې ایکس (پخواني ټوېټر) پاڼه کې وليکل، چې د سيمې او نړۍ لپاره د امنيت ګواښونه مخ په زياتېدو دي او د افغانستان اوسنی وضعيت جدي پاملرنې ته اړتيا لري. د هغه په وينا، د بېلابېلو وسله‌والو ډلو فعاليتونه نه يوازې د سيمې هېوادونه، بلکې نړيواله ټولنه هم له خطر سره مخ کوي

نوموړي زياته کړې: «اوس وخت د دې نه دی چې اشخاص د خپلو نظرونو د برجسته کولو لپاره له يو بل سره سيالي وکړي، بلکې اړينه ده چې د افغانستان د نږدې ګاونډيانو معقولې او عملي مشورې واورېدل شي.» هغه ټينګار کړی، چې د ګاونډيو هېوادونو اندېښنې بايد جدي ونيول شي او د ګډو هڅو له لارې د امنيتي ګواښونو د مخنيوي لپاره اغېزمن ګامونه واخيستل شي

شنونکي باور لري، چې د دراني څرګندونې د سيمه‌ييزو امنيتي اندېښنو انعکاس دی او دا خبرداری د دې څرګندونه کوي، چې که د افغانستان د خاورې د ناوړه استفادې مخه ونه نيول شي، نو پایلې به يې يوازې پر يو هېواد محدودې نه وي

دا څرګندونې په داسې حال کې کېږي، چې په دې وروستيو کې د افغانستان د امنيتي وضعيت په اړه د سيمې او نړۍ د بېلابېلو لورو له‌خوا ورته اندېښنې څرګندې شوې دي او د ګډو، عملي او همغږو اقداماتو غوښتنه زياته شوې ده