کویټې ته پر لاره پر ملي بس وسله‌ وال بريد؛ ۲۵ مسافر وتښتول شول

په پاکستان کې وسله‌والو راهزنانو د کویټې پر لور پر روان يو ملي بس خونړی او اندېښمنوونکی بريد کړی، چې په پايله کې يې ۲۵ مسافر تښتول شوي دي. دا پېښه هغه مهال رامنځته شوه، چې ياد بس د کویټې پر لويه لاره روان و او ناڅاپه د وسلوالو کسانو له لوري ودرول شو

د لومړنيو راپورونو له مخې، بريدګرو تر بس درولو وروسته يو شمېر مسافرين له زور او ګواښ سره مخ کړي او بيا يې ۲۵ تنه له ځان سره نامعلوم لور ته بوتلل. د پېښې له کبله د سيمې خلک او د مسافرو خپلوان سخت اندېښمن شوي دي

د پاکستان پوليسو په يوه اعلاميه کې ويلي، چې تر دې دمه يې د عملياتو په ترڅ کې ۱۰ تښتول شوي مسافر ژغورلي دي. د پوليسو په وينا، د پاتې برمته شويو کسانو د خلاصون لپاره د امنيتي ځواکونو پراخ عمليات لا هم روان دي او هڅه کېږي چې بريدګر ژر تر ژره ونيول شي

امنیتی چارواکو زياته کړې، چې د پېښې سيمه کلابنده شوې او د پلټنو ترڅنګ د استخباراتي معلوماتو پر بنسټ عمليات دوام لري. دوی ډاډ ورکړی، چې د ټولو تښتول شويو مسافرو د خوندي خلاصون لپاره به هيڅ ډول هڅه ونه سپمول شي

دا پېښه په داسې حال کې رامنځته کېږي، چې په وروستيو مياشتو کې د پاکستان په ځينو سيمو کې د لارو امنيت له جدي ننګونو سره مخ دی او د مسافرو پر وړاندې د وسلوالو ډلو بريدونه زيات شوي دي. شنونکي باور لري، چې د دغسې پېښو دوام د عامو خلکو پر ژوند او د سيمې پر امنيتي وضعيت ناوړه اغېز کوي

چارواکي وايي، د عملياتو د پرمختګ او د نورو مسافرو د برخليک په اړه به تازه معلومات له رسنيو سره شريک کړي