اسلام‌اباد -- شهباز شريف د خېبرپښتونخوا د ترهګرۍ قربانيانو وستايل؛ خو پوښتنې لا هم پر ځای دي

د پاکستان لومړي وزير شهباز شريف د خېبرپښتونخوا ايالت د خلکو د قربانيو ستاينه کړې او هغوی يې «زړور او مقاوم ولس» بللی، چې د ده په وينا، له کلونو راهيسې د ترهګرۍ پر وړاندې ولاړ دي او درنې انساني قربانۍ يې ورکړې دي. نوموړي دا څرګندونې د هريپور پوهنتون ته د وينا پر مهال وکړې

شهباز شريف وويل، چې د خېبرپښتونخوا خلکو نه يوازې د ترهګريزو بريدونو پر وړاندې زغم ښودلی، بلکې د پاکستان د امنيت د ټينګښت لپاره يې مهم رول لوبولی دی. هغه زياته کړه، چې د دغه ايالت قربانۍ به هېڅکله هېرې نه شي او حکومت د ترهګرۍ د له منځه وړلو لپاره خپلې هڅې جاري ساتي

خو دا څرګندونې په داسې حال کې مطرح کېږي، چې همدغه پاکستانی چارواکی تر دې وړاندې څو ځله د طالبانو اداره د تحريک طالبان پاکستان

د ملاتړ په تور تورنه کړې ده؛ هغه ډله چې د خېبرپښتونخوا په ګڼو خونړيو بريدونو کې يې لاس لرلی او د سلګونو ملکي وګړو او امنيتي ځواکونو د وژل کېدو مسؤليت ور پورې کېږي

د طالبانو ادارې دا تورونه رد کړي، خو تر اوسه يې د افغانستان په خاوره کې د وسلوالو ډلو د شتون په اړه د پاکستان او نړيوالې ټولنې اندېښنو ته روښانه او قانع کوونکی ځواب نه دی ورکړی. شنونکي وايي، د همدې مبهم دريځ له امله د سيمې امنيتي وضعيت لا هم نازک پاتې دی

سياسي شنونکي باور لري، چې که د پاکستان او طالبانو ترمنځ د باور فضا رامنځته نه شي او د وسلوالو ډلو پر وړاندې عملي او ګډ ګامونه وانخيستل شي، نو دا ناڅرګند حالت به نه يوازې د خېبرپښتونخوا، بلکې د ټولې سيمې امنيت له جدي ګواښ سره مخ کړي

په داسې حال کې چې د ترهګرۍ اور لا هم په خېبرپښتونخوا کې بل دی، دا پوښتنه لا هم بې‌ځوابه پاتې ده: ايا د متقابلو تورونو او نيمګړو ځوابونو دوام به د ستونزې د حل لاره هواره کړي، که به د سيمې بې‌ثباتي نوره هم ژوره کړي؟ د دې پوښتنې ځواب د راتلونکو سياسي او امنيتي پرېکړو پورې تړلی دی