برلین فردریش مرتس او د مشرتابه تر ټولو سخته ازموینه: د اروپا امنیت

برلین – د جرمني نامتو مجلې اشپیګل په خپل تازه سرمقاله کې د جرمني د صدراعظم فردریش مرتس پر وړاندې ولاړې سترې سیاسي او امنیتي ننګونې څېړلې دي؛ ننګونې چې نوموړی یې د پخوانیو ډېرو مشرانو په پرتله له سخت فشار سره مخ کړی دی

د مقالې له مخې، د مرتس تر ټولو لوی او تاریخي مسؤلیت د اروپا د امنیت دفاع ده، هغه هم په داسې حساسو شېبو کې چې د روسیې او اوکراین جګړه لا هم روانه ده او نړیوال سیاسي نظم له ژورو بدلونونو سره مخ دی. دا جګړه نه یوازې د ختیځې اروپا ثبات ګواښي، بلکې د ټولې اروپا امنیتي معادلې یې بدلې کړې دي

اشپیګل لیکي چې جرمني، د اروپا د تر ټولو لوی اقتصاد په توګه، اوس د امنیتي پرېکړو په مرکز کې ولاړ دی او د برلین رول د هر وخت په پرتله مهم شوی دی. فردریش مرتس اړ دی چې د ناټو د متحدینو غوښتنو، د اروپایي شریکانو اندېښنو او د کورني سیاست ترمنځ یو نازک توازن وساتي

سرمقاله ټینګار کوي چې د دې تاریخي مأموریت بریالیتوب یوازې د پوځي او سیاسي پرېکړو پورې محدود نه دی، بلکې تر ټولو مهمه دا ده چې مرتس وکولای شي د جرمني د ولس باور او ملاتړ ترلاسه کړي. د جرمني عامه افکار د جګړې، پوځي لګښتونو او امنیتي ژمنو په اړه ژورې پوښتنې لري، او د دې پوښتنو ځوابول د صدراعظم لپاره حیاتي بلل کېږي

د شنونکو په اند، که فردریش مرتس وکولای شي په روښانه لید، قوي ډیپلوماسۍ او ولس‌محوره سیاست سره دا ستونزمن پړاو مدیریت کړي، نو نوم به یې د اروپا د امنیت په تاریخ کې د یوه پرېکنده مشر په توګه ثبت شي. خو که په دې ازموینه کې پاتې راشي، پایلې به یې یوازې پر جرمني نه، بلکې پر ټوله اروپا اغېز ولري