پاکستان: د بهرنیو چارو وزارت ویاند، طاهر اندرابي، ویلي وسله‌والې ډلې د اسلام‌اباد–کابل د اړیکو د کړکېچ اصلي لامل دي

اسلام‌اباد – د پاکستان د بهرنیو چارو وزارت ویاند، طاهر اندرابي، ویلي چې په افغانستان کې د بېلابېلو ترهګرو ډلو حضور او فعالیت د اسلام‌اباد او کابل ترمنځ د اړیکو د ترینګلتیا اصلي لامل دی. نوموړي د ملګرو ملتونو د امنیت شورا وروستی راپور د پاکستان د دریځ لپاره یو روښانه تائید وباله

اندرابي د پنجشنبې په ورځ (۲۷ قوس) د بهرنیو چارو وزارت په اوونیزه خبري ناسته کې وویل چې په افغانستان کې د ترهګرو عناصرو شتون نه یوازې د سیمې امنیت له جدي ګواښ سره مخ کړی، بلکې د افغانستان د کورني ثبات او اقتصادي پراختیا هڅې یې هم کمزورې کړې دي د هغه په وینا، د ملګرو ملتونو د امنیت شورا راپور په څرګنده توګه د تحریک طالبان پاکستان  و د نورو بهرنیو ترهګرو عناصرو فعالیتونو ته اشاره کړې، کوم چې د پاکستان لپاره د امنیتي اندېښنو یوه مهمه سرچینه ګڼل کېږي. اندرابي ټینګار وکړ چې دا ډلې له افغان خاورې څخه د بریدونو پلان جوړوي او عملي کوي، چې دا چاره د ښه ګاونډیتوب له اصولو سره په ټکر کې ده

د پاکستان د بهرنیو چارو وزارت ویاند زیاته کړه چې اسلام‌اباد په وار وار د افغانستان له واکمنو چارواکو غوښتي څو د خپلې خاورې د کارولو مخه د نورو هېوادونو پر ضد ونیسي، خو تر اوسه عملي او قناعت‌بخښونکي ګامونه نه دي پورته شوي

سیاسي شنونکي باور لري چې د امنیت شورا راپور به پر نړیواله کچه د افغانستان وضعیت ته لا زیات پام واړوي او ښایي د سیمې پر دیپلوماتیکو اړیکو هم اغېز ولري. دوی وایي، تر هغو چې د ترهګرو ډلو پر ضد روښانه، شفاف او عملي اقدامات ونه شي، د پاکستان او افغانستان ترمنځ د باور فضا به لا هم له ستونزو سره مخ وي

په ورته وخت کې، پاکستان یو ځل بیا ټینګار کړی چې د سیمې دوامدار امنیت او ثبات یوازې هغه مهال ممکن دی چې ټول هېوادونه د ترهګرۍ پر وړاندې ګډ او صادقانه دریځ خپل کړي