حزب‌الله لبنان: مقاومت به هېڅ صورت تسلیمېږي نه

د لبنان د حزب‌الله غورځنګ ویلي، چې «تسلیم» د مقاومت په قاموس کې هېڅ ځای نه لري او د هر ډول تېري پر وړاندې به د ځان دفاع ته دوام ورکړي. دا څرګندونې د حزب‌الله د استازي، حسین الحاج حسن، له لوري د لبنان په پارلمان کې وشوې

الحاج حسن ټینګار وکړ، چې مقاومت د لبنان د ولس مشروع حق دی او د بهرنیو یرغلونو او پوځي ګواښونو پر وړاندې د ځان دفاع کول یو طبیعي او قانوني عمل ګڼل کېږي. د هغه په وینا، هغه څوک چې د تسلیمېدو خبرې کوي، د لبنان د خلکو د عزت، خپلواکۍ او ملي حاکمیت له واقعیتونو سترګې پټوي

نوموړي زیاته کړه، چې مقاومت د فشار، ګواښ او بندیزونو له لارې نه کمزوری کېږي او نه هم له خپلې لارې اوښتلی شي. هغه وویل: «هر کله چې پر لبنان تېری وشي، مقاومت به د ولس تر څنګ ولاړ وي او د خپلې خاورې دفاع به کوي

دا څرګندونې په داسې حال کې کېږي، چې په وروستیو میاشتو کې د لبنان او اسرائیلو ترمنځ تاوتریخوالی زیات شوی او سلګونه کسان په بریدونو کې وژل شوي او یا ټپیان شوي دي. حزب‌الله دا بریدونه د لبنان پر ملي حاکمیت ښکاره تېری بولي

سیاسي شنونکي وایي، د حزب‌الله دا دریځ د لبنان د امنیتي وضعیت د لا پېچلتیا نښه ده او ښيي چې د پوځي ګواښونو پر وړاندې د مقاومت رول لا هم د لبنان په سیاسي او امنیتي معادلو کې یو مهم ځای لري

په ورته وخت کې، د لبنان دننه بحثونه هم تود شوي دي؛ یو لوری پر دیپلوماتیکو لارو ټینګار کوي، خو بل لوری باور لري چې بې له مقاومت څخه هېواد د بهرنیو ګواښونو پر وړاندې بې‌وسه پاتې کېږي. دا اختلافونه ښيي، چې د لبنان د راتلونکي امنیت او حاکمیت په اړه لا هم ژورې پوښتنې پر ځای پاتې دي