قندهار ته تر سفر وروسته د سراج‌الدین حقاني د دریځ بدلون

قندهار ته د سراج‌الدین حقاني تر وروستي سفر او د طالبانو د حکومت له مشر هبت‌الله اخوندزاده سره تر لیدنې وروسته، د نوموړي په سیاسي دریځ کې بدلون یو ځل بیا د دې ډلې د کورنیو اختلافاتو په اړه اټکلونه پیاوړي کړي دي

راپورونه ښيي چې سراج‌الدین حقاني په خپل وروستي سفر کې قندهار ته ولاړ او هلته یې د طالبانو له مشر سره مهمه ناسته کړې ده. دا لیدنه په داسې حساس وخت کې ترسره شوه، چې نوموړي تر دې وړاندې په خوست ولایت کې په یوې وینا کې د طالبانو د اوسنیو تګلارو پر وړاندې نیوکې کړې وې

په خوست کې د خپلې وینا پر مهال، حقاني که څه هم د طالبانو د مشر نوم په ښکاره یاد نه کړ، خو د حکومت پر ځینو سیاستونو یې نیغ په نیغه انتقاد وکړ او ویې ویل چې ځینې پرېکړې د ولس له غوښتنو او د هېواد له ګټو سره سمون نه لري. هماغه وینا د طالبانو د مشرتابه دننه د نظر اختلافاتو د څرګندېدو په توګه تعبیر شوه

خو له قندهار څخه تر راستنېدو وروسته، د سراج‌الدین حقاني څرګندونې تر ډېره نرمې شوې او د یووالي او اطاعت پر ټینګار ولاړې وې، چې دا بدلون د سیاسي شنونکو پام ځان ته اړولی دی. شنونکي وایي، دا چرخش ښيي چې د طالبانو په مشرتابه کې د واک، سیاست او تګلارو پر سر جدي بحثونه روان دي

سیاسي کارپوهان باور لري، چې د طالبانو دننه د نظر اختلافات نوې موضوع نه ده، خو د لوړپوړو څېرو له لوري په علني ډول د انتقادي دریځ څرګندول او بیا ناڅاپي بدلون، د دې ډلې د داخلي جوړښت او تصمیم‌نیونې د میکانېزمونو په اړه پوښتنې راولاړوي

تر اوسه د طالبانو رسمي ویاندانو د دې لیدنې او د دریځ د بدلون په اړه روښانه توضیحات نه دي ورکړي، خو څارونکي وایي چې دا تحول به د طالبانو د راتلونکو سیاسي پرېکړو او د حکومت د داخلي ثبات پر وضعیت اغېز ولري