د اسرائیل سفیر د برلین پر حکومت نیوکه وکړه، سره له دې چې پراخ ملاتړ یې تر لاسه کړی

په جرمني کې د اسرائیل سفیر ران بروسر، سره له دې چې برلین د اسرائیل له تر ټولو نږدې سیاسي او پوځي ملاتړو څخه شمېرل کېږي، د جرمني د حکومت پر کړنو نیوکې کړې دي. نوموړي ادعا کړې چې په جرمني ټولنه کې د یهودستیزۍ کچه لوړه شوې او د دولت اقدامات د دې پدیدې د مهار لپاره کافي نه دي

بروسر په خبرو کې له جرمنیو رسنیو سره ویلي، چې چپ‌ګرا، ښي‌ګرا او ځینې اسلامي ډلې د یهودستیزۍ د پراخېدو لامل ګرځي. هغه په ځانګړي ډول چپ‌ګرایان «تر ټولو خطرناک» بللي او ویلي یې دي چې دا ډلې د اسرائیل پر وړاندې د نفرت فضا لا پسې توده کړې ده

د اسرائیل سفیر همداراز ادعا کړې چې یو شمېر محصلان او چپ‌ګرا فعالان په پټه توګه له حماس ملاتړ کوي. نوموړي د جرمني له چارواکو غوښتي چې له دغو کسانو سره سخت چلند وشي او ان د هغوی د شړلو (اخراج) غوښتنه یې کړې ده. د هغه په وینا، د دې ډول دریځونو پر وړاندې نرم چلند د یهودي ټولنې امنیت له ګواښ سره مخ کوي

بروسر زیاته کړې، چې په جرمني کې ځینې اسرائیلي هنرمندان اړ شوي دي خپل هویت پټ وساتي، ځکه د امنیتي اندېښنو له امله ځان خوندي نه احساسوي. دا څرګندونې د جرمني په فرهنګي او اکاډمیکو کړیو کې د پراخو بحثونو لامل شوې دي

دا نیوکې په داسې حال کې مطرح کېږي، چې د غزې د جګړې پر مهال د اسرائیل پراخو پوځي عملیاتو او د فلسطیني ملکي وګړو د لوړو تلفاتو له امله، د جرمني د حکومت پر بې‌قید شرط ملاتړ د بشري حقونو بنسټونو او د مدني ټولنې له لوري جدي انتقادونه شوي دي

شنونکي وایي، د اسرائیل د سفیر دا څرګندونې یو ځل بیا په جرمني کې د بیان ازادۍ، سیاسي اعتراض او د بهرني سیاست ترمنځ حساس توازن تر پوښتنې لاندې راولي؛ هغه بحث چې ښايي په راتلونکو میاشتو کې لا پسې ژور شي