ریاض / تهران – د سعودي عربستان ولیعهد او صدراعظم، محمد بن سلمان د ایران پر وړاندې به زموږ فضا او خاوره د جګړې لپاره نه کارېږي

بریانیوز(چهارشنبه، ۸ دلو۱۴۰۴) ریاض / تهران – د سعودي عربستان ولیعهد او صدراعظم، محمد بن سلمان، د ایران له ولسمشر مسعود پزشکیان سره په یوه مهمه ټیلیفوني اړیکه کې ټینګار کړی چې سعودي عربستان به هېڅکله هم د ایران پر وړاندې د هر ډول نظامي اقدام لپاره د خپلې هوايي فضا یا خاورې د کارولو اجازه ورنه کړي

د نړیوال خبري اژانس رویټرز د راپور له مخې، دغه ټیلیفوني خبرې اترې په داسې حساسو شېبو کې ترسره شوې دي چې سیمه د سیاسي کړکېچونو او امنیتي اندېښنو له زیاتوالي سره مخ ده. بن سلمان په دې خبرو کې روښانه کړې چې ریاض د جګړې پر ځای د سولې، ثبات او خبرو اترو پلوی دی

سعودي ولیعهد ویلي، د هغه هېواد له هرې هغې هڅې ملاتړ کوي چې د شخړو او اختلافاتو د حل یوازینۍ لاره ډیپلوماسي او تفاهم بولي. نوموړي ټینګار کړی چې دوامدار امنیت یوازې هغه وخت شونی دی چې هېوادونه د زور کارولو پر ځای، د خبرو مېز ته کښیني

د راپور له مخې، محمد بن سلمان زیاته کړې چې سعودي عربستان غواړي په سیمه کې د تشنج د کمولو، باور جوړونې او متقابل درناوي له لارې دایمي ثبات رامنځته شي. هغه د ایران له ولسمشر سره د اړیکو د ښه والي پر ارزښت هم خبرې کړي او دا یې د سیمې د امنیت لپاره مهم ګام بللی دی

له بلې خوا، د ایران ولسمشر مسعود پزشکیان هم د خبرو اترو هرکلی کړی او د سیمې د هېوادونو ترمنځ د همکاریو پر پراختیا یې ټینګار کړی دی. شنونکي وایي، دا ډول تماسونه ښيي چې دواړه هېوادونه هڅه کوي د تېرې سیالۍ پر ځای د نوې سیاسي همغږۍ لور ته ګام واخلي

سیاسي کارپوهان باور لري چې د سعودي عربستان دا څرګند دریځ نه یوازې د ایران لپاره د ډاډ پیغام دی، بلکې د سیمې نورو هېوادونو ته هم دا پیغام رسوي چې ریاض د جګړې پر ځای د سولې محور ګرځېدلی دی

په داسې حال کې چې منځنی ختیځ لا هم له بې‌ثباتۍ سره مخ دی، د سعودي او ایران ترمنځ دا تماس د سیمې د راتلونکو بدلونونو لپاره یو مهم او هیله‌بښونکی پرمختګ بلل کېږ