کابل – په افغانستان کې بشري کړکېچ لا پسې ژورېږي؛ په ۲۰۲۶ کال کې نږدې ۲۲ میلیونه کسان بېړنیو مرستو ته اړتیا لري

 بریانیوز(جمعه،٩ دلو۱۴۰۴)   د ملګرو ملتونو د بشري چارو د همغږۍ دفتر (اوچا) خبرداری ورکړی چې افغانستان به په ۲۰۲۶ کال کې هم د نړۍ له تر ټولو سختو او دوامدارو بشري کړکېچونو سره مخ وي. د اوچا د تازه ارزونو له مخې، شاوخوا ۲۱.۹ میلیونه افغانان چې د هېواد نږدې ۴۵ سلنه نفوس جوړوي، د ژوند د دوام لپاره به بېړنیو بشري مرستو ته اړتیا ولري

اوچا ویلي، چې د اوږدمهاله جګړو پایلې، ژور اقتصادي رکود، پراخه بې‌وزلي، بې‌کاري، اقلیمي بدلونونه او پر بنسټیزو خدماتو محدود لاسرسی هغه اصلي عوامل دي چې د افغانستان بشري وضعیت یې تر خطرناک پړاو رسولی دی. د دې ادارې په وینا، د میلیونونو کورنیو لپاره د خوړو برابرول، روغتیايي خدمتونه، پاکې اوبه او سرپناه لا هم جدي ستونزه ده

د ملګرو ملتونو د راپور له مخې، په افغانستان کې د خوړو ناامني په لوړه کچه پاتې ده او میلیونونه ماشومان، ښځې او زاړه کسان د خوارځواکۍ له جدي ګواښ سره مخ دي. اوچا خبرداری ورکړی چې که کافي او پر وخت مرستې ونه رسېږي، د ماشومانو د خوارځواکۍ کچه به لا پسې لوړه شي او دا وضعیت به د یوې “ورکې شوې نسل” د رامنځته کېدو خطر زیات کړي

راپور همداراز څرګندوي چې د روغتیايي سیستم کمزورتیا، د ښوونځیو او بنسټیزو خدمتونو محدود فعالیت، او د طبیعي پېښو لکه وچکالۍ او سېلابونو زیاتوالی د خلکو ژوند لا ستونزمن کړی دی. د اوچا په وینا، اقلیمي بدلون افغانستان د سختو طبیعي پېښو پر وړاندې ډېر زیان‌من کړی، چې له امله یې د خلکو د عاید سرچینې له منځه تللې او داخلي بې‌ځایه کېدل زیات شوي دي

اوچا له نړیوالې ټولنې غوښتي چې افغانستان له پامه و نه غورځوي او د بشري مرستو لپاره کافي مالي سرچینې برابرې کړي. دې ادارې ټینګار کړی چې بشري مرستې باید له سیاسي ملاحظاتو جلا وساتل شي، ځکه د میلیونونو خلکو ژوند په مستقیم ډول له دې مرستو سره تړلی دی

د بشري چارو د کارپوهانو په باور، تر هغې چې په افغانستان کې دوامدار اقتصادي ثبات، ټولشموله پرمختیا او بنسټیز خدمات بېرته پیاوړي نه شي، بشري اړتیاوې به همداسې لوړې پاتې شي. هغوی وایي، لنډمهاله مرستې که څه هم حیاتي دي، خو د کړکېچ د تلپاتې حل لپاره اوږدمهاله پانګونه او منظمې پراختیايي تګلارې اړینې دي

دا خبرداری په داسې حال کې ورکول کېږي، چې د افغانستان خلک له څو کلونو راهیسې د پرله‌پسې بحرانونو تر فشار لاندې ژوند کوي او د ۲۰۲۶ کال لپاره د ۲۱.۹ میلیونه کسانو د بېړنیو مرستو اړتیا ښيي، چې بشري وضعیت نه یوازې ښه شوی نه دی، بلکې د لا خرابېدو په لور روان دی