هرات کې د غلاوو د کچې لوړېدل؛ د خلکو اندېښنې زیاتې شوې

د هرات امنیه قومندانۍ: په دوو میاشتو کې نږدې ۴۰۰ کسان د بېلابېلو جرمونو په تور نیول شوي

بریانیوز( شنبه, ١١ دلو ١٤٠٤)

د هرات د امنیې قومندانۍ مسوولین وایي، چې په تېره یوه اوونۍ کې یې د حرفوي غلو درې ډلې نیولي دي، چې د موټرسایکلونو او موټرو د غلا په جرمونو کې ښکېلې وه. د چارواکو په وینا، دغو کسانو د ښار په بېلابېلو سیمو کې د خلکو موټرونه، موټرسایکلونه او نور شخصي توکي غلا کول.

د هرات امنیتي چارواکي زیاتوي، چې یوازې په تېرو دوو میاشتو کې نږدې ۴۰۰ کسان د بېلابېلو جرمونو په تور نیول شوي دي. په دغو جرمونو کې وسله‌والې غلاوې، قتل، د غیرقانوني وسلو لېږد، د عامه نظم ګډوډول او نور جنایي جرمونه شامل دي.

دا په داسې حال کې ده، چې د هرات ښار اوسېدونکي د غلاوو د زیاتېدو له امله جدي اندېښنه څرګندوي. د ښار یو شمېر اوسېدونکي وایي، چې په وروستیو اوونیو کې غله ان د ورځې په رڼا کې دوکانونه لوټي او یا هم موټرونه او موټرسایکلونه تښتوي، چې دې وضعیت د خلکو د امنیت په اړه اندېښنې زیاتې کړې دي.

د هرات اوسېدونکي له مسؤلو چارواکو غواړي، چې د امنیت د ټینګښت لپاره عملي او جدي ګامونه پورته کړي، د غلاوو او نورو جنایي جرمونو پر وړاندې مبارزه لا پیاوړې کړي او د خلکو د سر او مال خوندیتوب ته جدي پاملرنه وکړي.

په ورته وخت کې، د امنیتي ادارو مسوولین ډاډ ورکوي، چې د جرمونو د مخنیوي او د امنیت د ټینګښت لپاره خپلې هڅې روانې ساتي او هڅه کوي، څو د ښار اوسېدونکو ته یو خوندي چاپېریال برابر کړي.