د تاجیکستان–افغانستان پر پوله خونړۍ پېښه؛ د نشه‌ يي توکو د قاچاق پر مهال درې افغانان ووژل شول

د تاجیکستان–افغانستان پر پوله خونړۍ پېښه؛ د نشه‌يي توکو د قاچاق پر مهال درې افغانان ووژل شول

   بریانیوز (شنبه، ١١ دلو ١٤٠٤)      

د تاجیکستان چارواکو اعلان کړی چې د دې هېواد له افغانستان سره پر ګډه پوله د یوې جدي امنیتي نښتې په ترڅ کې درې د افغانستان وګړي وژل شوي دي. د تاجیکستان د ملي امنیت دولتي کمېټې په خپره کړې اعلامیه کې ویلي، چې وژل شوي کسان د نشه‌يي توکو د قاچاق له یوې ډلې سره تړاو درلود او هغه مهال د سرحدي ځواکونو له لوري په نښه شول، چې غوښتل یې په ناقانونه توګه له افغانستانه تاجیکستان ته واوړي

د رسمي معلوماتو له مخې، دا پېښه د تېرې پنجشنبې په ورځ د شپې ناوخته رامنځته شوې ده. تاجیکستاني سرحدي ځواکونه وايي، چې د پولې د څارنې پر مهال یې د مشکوکو کسانو حرکتونه ولیدل او کله چې هغوی د درولو هڅه وشوه، نښته رامنځته شوه. د امنیتي ځواکونو په وینا، یادو کسانو د مقاومت هڅه کړې، چې له امله یې وسله‌واله شخړه رامنځته شوه او په پایله کې درې تنه ووژل شول

په بیان کې راغلي، چې د وژل شویو کسانو له ډلې جاوید او رشید د تخار ولایت د چاه‌آب ولسوالۍ د وریچې کلي اوسېدونکي وو، او درېیم کس صابر نومېده، چې د همدې ولسوالۍ د انجیر کلي پورې تړاو لري. چارواکي زیاتوي، چې د همدې ډلې دوه نور غړي د نښتې له ځایه په تېښته بریالي شوي او بېرته د افغانستان خاورې ته اوښتي دي

د تاجیکستان د ملي امنیت کمېټې همدارنګه ویلي، چې د عملیاتو پر مهال له دغې ډلې څخه بېلابېلې وسلې او د پام وړ اندازه نشه‌يي توکي نیول شوي دي. که څه هم د نیول شویو موادو دقیق ډول او اندازه لا نه ده په ډاګه شوې، خو چارواکي ټینګار کوي چې دا توکي د ناقانونه قاچاق لپاره برابر شوي وو او د سیمې امنیت ته یې جدي ګواښ پېښاوه

تاجیکستاني چارواکي وایي، چې د افغانستان له لوري د نشه‌يي توکو قاچاق د دوی لپاره یوه دوامداره امنیتي اندېښنه ده او هر کال د دې پولې له لارې د ناقانونه تګ راتګ ګڼې هڅې شنډوي. د ملي امنیت کمېټې په خبره، سرحدي ځواکونه به د پولې د خوندي کولو لپاره خپلې هڅې نورې هم پراخې کړي او د هر ډول ناقانونه فعالیت پر وړاندې به کلک اقدام وکړي

بلخوا، د طالبانو حکومت تر اوسه پورې د دې پېښې په تړاو کوم رسمي دریځ نه دی خپل کړی. خو د سیمه‌ییزو څارونکو په باور، دا ډول پېښې کولای شي د دواړو هېوادونو ترمنځ د سرحدي همکارۍ اړتیا لا نوره هم روښانه کړي، څو د نشه‌يي توکو قاچاق، ناقانونه تګ راتګ او سرحدي تاوتریخوالی راکم شي

دغه پېښه په داسې وخت کې رامنځته شوې، چې د افغانستان او منځنۍ اسیا ترمنځ د پولې اوږده کرښه د امنیتي ننګونو سره مخ ده او د نشه‌يي توکو قاچاق لا هم د سیمې د ثبات او خلکو د ژوند لپاره یو جدي ګواښ بلل کېږي