روسي څېړونکی: طالبان او د امریکا استخبارات پټې اړیکې لري

روسي څېړونکي او د افغانستان د امنیتي او سیاسي چارو شنونکي آندری سرنکو په خپل تازه خپور شوي کتاب «رازهای استخباراتی طالبان» کې ادعا کړې چې طالبانو له امریکا متحده ایالاتو سره پټې استخباراتي اړیکې ساتلي دي.

بریانیوز( جمعه، ١٧ دلو ١٤٠٤)

نوموړي ویلي چې داسې اسناد یې ترلاسه کړي چې د طالبانو او امریکايي استخباراتي کړیو ترمنځ د همکارۍ نښې په کې ښکاره دي.

سرنکو وایي، دغه اسناد د هغو افغانانو له لوري ورکړل شوي چې هغه یې «وطن‌دوست افغانان» بولي. د ده په وینا، دغو کسانو د افغانستان د راتلونکې، ملي حاکمیت او امنیت په اړه د اندېښنو له امله دا معلومات له ده سره شریک کړي دي.

د بګرام هوايي اډې په اړه ادعا

د کتاب له مهمو او جنجالي برخو څخه یوه دا ده چې د طالبانو اداره د امریکا چارواکو ته د بګرام هوايي اډې د لیدنې بلنه ورکړې ده. سرنکو ادعا کوي چې دا اقدام د دې لپاره شوی، څو واشنګټن ته ډاډ ورکړل شي چې په بګرام اډه کې د چین هېڅ ډول پوځي یا استخباراتي حضور نشته.

هغه زیاتوي چې امریکا د چین د نفوذ او احتمالي استخباراتي فعالیتونو په اړه اندېښنه لري، او طالبان هڅه کوي د دې ډول همکاریو له لارې د امریکا اعتماد بېرته ترلاسه کړي.

پټې اړیکې او ښکاره شعارونه

سرنکو په خپل کتاب کې لیکلي، سره له دې چې طالبان په علني توګه د امریکا ضد شعارونه ورکوي، خو په عمل کې هڅه کوي له واشنګټن سره استخباراتي تعامل وساتي. د ده په باور، دا دوه‌مخیز سیاست د طالبانو د بقا، نړیوال مشروعیت او د واک د ټینګښت لپاره کارول کېږي.

هغه ټینګار کوي چې طالبان غواړي د نړیوالو قدرتونو ترمنځ ځان د «منځګړي ځواک» په توګه مطرح کړي، خو دا سیاست د افغانستان د خلکو لپاره شفاف نه دی او د هېواد راتلونکی له جدي پوښتنو سره مخ کوي.

د سیمې لپاره امنیتي اندېښنې

روسي څېړونکی خبرداری ورکوي چې د طالبانو او امریکا ترمنځ دا ډول پټې اړیکې د سیمې د هېوادونو، په ځانګړي ډول روسیې، چین، ایران او د مرکزي اسیا هېوادونو لپاره امنیتي ګواښونه زېږولی شي.

د سرنکو په وینا، افغانستان یو ځل بیا د نړیوالو استخباراتي سیالیو په مرکز بدل شوی او هر ډول پټه معامله کولی شي د سیمې ثبات له خطر سره مخ کړي.